საჯარო რეესტრის მონაცემების მიხედვით, ბინა, სადაც დღეს დილიდან სპეცოპერაცია მიმდინარეობს, 2023 წლის აპრილამდე გოჩა კონცელიძის საკუთრებაში იყო. აღნიშნული პირი რესან კონცელიძის ძმისშვილია.
ჰაიდარ აბაშიძის №60-ში, მე-18 სართულზე არსებული ბინა, გოჩა კონცელიძემ 2023 წელს შვილს – ნინი კონცელიძეს გადაუფორმა. რესან კონცელიძის თქმით, ნინი კონცელიძეს საცხოვრებელი ფართი გაქირავებული ჰქონდა, თუმცა კონკრეტულად ვისზე არ იცის.
სპეცოპერაციასთან და აღნიშნულ ბინასთან რაიმე სახის კავშირს კატეგორიულად უარყოფს რესან კონცელიძე, თუმცა ამბობს, რომ არ ჰქონდა ინფორმაცია ბინაში მიმდინარე პროცესების შესახებ.
„არავითარი ინფორმაცია, არავითარი ქოლცენტრი. ვუარყოფ კავშირს, არც ვიცოდი, მერე გავიგე. ათასი კონცელიძეა, მერე გავიგე, რომ მის შვილს [გაჩა გოკნცელიძის] ჰქონია მანდ ბინა, რომელიც გაქირავებულია. მე რა ვიცი ვის სად რა ბინა აქვს, რაღაც კონცელიძეს გაიგებ და მე მაკავშირებ, რა გინდა გამაგებინე,“ – განაცხადა რესან კონცელიძემ „აჭარა თაიმსთან“ სატელეფონო საუბრისას.
ცნობისთვის: რესან კონცელიძე „ქართული ოცნების“ აჭარის ფინანსთა და ეკონომიკის მინისტრის მოადგილეა. მანამდე ის საქართველოს პარლამენტის წევრი იყო.
ინფორმაციისთვის: ამ დრომდე, სახელმწიფო უსაფრთხოების სამსახური არ განმარტავს, რას უკავშირდება ჰაიდარ აბაშიძის ქუჩაზე მიმდინარე სპეცოპერაცია.
გარემოება: არასამთავრობო ორგანიზაცია „საერთაშორისო გამჭვირვალობა საქართველოს“ კვლევის თანახმად, პარლამენტში საქმიანობისას, რესან კონცელიძის მიერ ინიცირებული სამშენებლო ამნისტიის კანონი ინტერესთა კონფლიქტის ეჭვებს აჩენს. კვლევაში აღნიშნულია, რომ მისი ძმისშვილები – ვახტანგ და გოჩა კონცელიძეები, სამშენებლო ბიზნესში არიან ჩართულნი, ორგანიზაციის შეფასებით, ეს გარემოებები კითხვებს აჩენს საკანონმდებლო ინიციატივის მიუკერძოებლობასთან დაკავშირებით.
კონცელიძეების სამშენებლო ბიზნესი ბათუმში და საეჭვო კორუფციული სქემა
