გარემოსდაცვითი ზედამხედველობის დეპარტამენტი მოსახლეობას შეახსენებს, რომ 28 თებერვალს გადამფრენ ფრინველებზე ნადირობის სეზონი ოფიციალურად სრულდება. უწყების ცნობით, უკანონო ნადირობის პრევენციის მიზნით, 1 მარტიდან დეპარტამენტის თანამშრომლები მთელი ქვეყნის მასშტაბით 24-საათიან გაძლიერებულ კონტროლს განახორციელებენ.
აკრძალულ პერიოდში ნადირობის შემთხვევაში, კანონის დამრღვევთა მიმართ საჯარიმო სანქციები ამოქმედდება. რიგ შემთხვევებში გათვალისწინებულია მოპოვებული ნანადირევისა და სანადირო იარაღის კონფისკაცია, ასევე შესაძლებელია სანადირო ცეცხლსასროლი იარაღის ტარების უფლების ჩამორთმევა.
უწყების ინფორმაციით, უკანონოდ მოპოვებული სახეობის შემთხვევაში, ჯარიმას გარემოსთვის მიყენებული ზიანის ანაზღაურებაც დაემატება, ხოლო მნიშვნელოვანი ზიანის შემთხვევაში, შესაძლოა სისხლის სამართლის პასუხისმგებლობის საკითხიც დადგეს.
გარემოსდაცვითი ზედამხედველობის დეპარტამენტის ცნობით, ნადირობის სეზონის განმავლობაში – 2025 წლის 23 აგვისტოდან დღემდე – გამოვლენილია 893 სამართალდარღვევა, მათ შორის 9 ფაქტი შეიცავს სისხლის სამართლის დანაშაულის ნიშნებს და მასალები შესაბამის უწყებებში გადაიგზავნა.
