„დინამო ბათუმს“ ახალი მესაკუთრე ჰყავს. კლუბის 100%-იან წილს სააქციო საზოგადოება „დ.ბ 1923“ უხელმძღვანელებს. ინფორმაცია ახალი მესაკუთრის შესახებ „დინამო ბათუმმა“ სოციალურ ქსელში დაადასტურა.
„საფეხბურთო კლუბ ბათუმის დინამოს გასხვისების პროცესი ოფიციალურად დასრულდა. კლუბი ადასტურებს, რომ „დინამო ბათუმის“ 100%-იანი წილი სააქციო საზოგადოება „დ.ბ 1923“-მა შეიძინა. სააქციო საზოგადოებამ „დინამო ბათუმის“ 100%-იანი წილი 30-მილიონიანი ვალდებულებისა და კლუბის გრძელვადიანი სტრატეგიული განვითარების საფუძველზე მიიღო. „დინამო ბათუმის“ შესყიდვა დამტკიცებულია აჭარის ფინანსთა და ეკონომიკის სამინისტროს მიერ,“ – წერია განცხადებაში.
„დინამო ბათუმი“ განმარტავს, რომ ახალი ხელმძღვანელობა კლუბის არსებული პრობლემების მოგვარებასა და განვითარების ახალი ეტაპის დაწყებას პირდება. ახალი მენეჯმენტის პირველადი სამოქმედო გეგმა ფინანსური და იურიდიული პრობლემების, მათ შორის ფიფას მიერ დაწესებული სატრანსფერო შეზღუდვის, მოგვარებას ითვალისწინებს. სააქციო საზოგადოება „დ.ბ 1923“-მა კლუბზე სრული კონტროლი 29 დეკემბერს მოიპოვა.
რაც შეეხება „თოლიების“ ახალ მესაკუთრეს, „დ.ბ 1923“ ბათუმელი ბიზნესმენის, თემურ მიქელაძის მფლობელობაშია. „მეტროპოლისისა“ და „კროკობეთის“ თანადამფუძნებლის თქმით:
თემურ მიქელაძე:
„ბედნიერი ვარ, რომ დღეს ბათუმის „დინამოსთან“ ერთად ახალ, ძალიან საინტერესო მოგზაურობას ვიწყებ. ჩვენს გულშემატკივართან ერთად ბევრი დიდი ოცნება და მიზანი გვაქვს შესასრულებელი. ჩემთვის, როგორც ბათუმში დაბადებული და გაზრდილი ადამიანისთვის, განსაკუთრებული პატივია, ვიყო ამ კლუბის წინსვლისა და მისი მომავლის ნაწილი. მინდა მადლობა გადავუხადო ჯონი ბაკურაძისა და არჩილ ბერიძის ოჯახებს ამ პროცესში გამოვლენილი დამოკიდებულებისთვის და იმ გამარჯვებებისთვის, რომელთაც მათ „დინამო ბათუმთან“ ერთად მიაღწიეს.“
განცხადებაში მიქელაძემ სამომავლო გეგმებზეც ისაუბრა. მისი თქმით, „დინამო ბათუმი“ სააქციო საზოგადოებად გარდაიქმნება, რაც კლუბში ფინანსურად მდგრადი გარემოს შექმნას ისახავს მიზნად. თუმცა ჯერჯერობით უცნობია, როდის განხორციელდება აღნიშნული პროექტი. განცხადებაში აღნიშნულია, რომ პროცესი „გარდამავალი პერიოდის დასრულებისთანავე“ დაიწყება.
„ჩვენი მიზანია ფინანსურად მდგრადი კლუბის შექმნა, რომელიც გრძელვადიან წარმატებას მიაღწევს როგორც მოედანზე, ისე მის მიღმა. სწორედ ამიტომ „დინამო ბათუმი“ სააქციო საზოგადოებად გარდაიქმნება. ეს მოდელი ნებისმიერ მსურველს მისცემს საშუალებას, შეიძინოს კლუბის აქციები და ამ ფორმით ჩაერთოს მის განვითარებაში. ეს ეხება როგორც ადგილობრივ ბიზნესმენებს, ისე გულშემატკივართა ჯგუფებსა და ნებისმიერ დაინტერესებულ პირს, ვისაც სურვილი ექნება, კლუბი ჩვენთან ერთად განავითაროს. ვთვლი, რომ ეს ძალიან მნიშვნელოვანი ინიციატივაა და ბევრი ადამიანი მოისურვებს ჩვენი პროექტის მონაწილე გახდეს. ამიტომ გარდამავალი პერიოდის დასრულებისთანავე აქტიურად დავიწყებთ კლუბის აქციების გასხვისების პროცესს,“ – წერია განცხადებაში.
„დინამო ბათუმის“ ტრანსფორმაციისა და ახალი მფლობელისთვის გადაბარების პროცესში ჩართულია საკონსულტაციო კომპანია Sports Orient, რომელიც დეკემბერ-იანვრის პერიოდში კლუბში აუდიტს ჩაატარებს და ახალ მესაკუთრეს ფინანსური და სამართლებრივი მდგომარეობის შეფასებაში დაეხმარება.
ავტორი: დიმიტრი გორგილაძე
