კეტოტიფენი ეფექტიანი ანტიჰისტამინური საშუალებაა ალერგიული რეაქციების სამკურნალოდ. ის ჩვენს საზოგადოებაში საკმაოდ გავრცელებული და ხშირად გამოყენებადი წამალია, მაგრამ ეს დაუდევრად, თვითნებურად მკურნალობისკენ არ უნდა გვიბიძგებდეს.
თუკი მიიჩნევთ, რომ კეტოტიფენი თქვენს სიმპტომებს ეფექტიანად გაუმკლავდება, მიმართეთ ექიმს და დააზუსტეთ დოზირება, მიღების სიხშირე და წესი. გარკვეულ შემთხვევებში შეიძლება ფარმაცევტთან კონსულტაციაც დაგეხმაროთ.
წამლის მიღების წესები
კეტოტიფენი საკმაოდ ძლიერი მედიკამენტია და უმჯობესია, ის ექიმის დანიშნულებით, შესაბამისი მკურნალობის ფარგლებში იქნეს მიღებული. თუკი მიღების წესის, დროისა თუ ფორმის შესახებ რაიმე კითხვები გაქვთ, არ მიიღოთ გადაწყვეტილება თვითნებურად და აუცილებლად მიმართეთ ექიმს, ექთანს ან ფარმაცევტს.
თუკი მკურნალობის პერიდოში აღმოაჩინეთ, რომ კეტოტიფენის დამამშვიდებელი ეფექტის მიმართ მგრძნობიარე ხართ, შეატყობინეთ მკურნალ ექიმს — არ არის გამორიცხული, წამლის დოზის ცვლილება დაგჭირდეთ საწყის ეტაპზე მაინც. როგორ გაგრძელდეს მკურნალობა — ამაზე გადაწყვეტილება თქვენმა ექიმმა უნდა მიიღოს.
გაითვალისწინეთ, რომ კეტოტიფენით მკურნალობის პერიოდში დაუშვებელია ალკოჰოლის მიღება. თუკი კეტოტიფენის დასაშვებზე/გამოწერილზე მეტი დოზა მიიღეთ, სასწრაფოდ მიმართეთ ექიმს, ან გამოიძახეთ სასწრაფო დახმარება. რეკომენდებული დოზის მიღება დაგავიწყდათ? — მიიღეთ გახსენებისთანავე. მაგრამ გაითვალისწინეთ, რომ ტაბლეტების მიღებებს შორის გარკვეული დრო უნდა გავიდეს. ამიტომაც, თუკი პირველი დოზა დაგავიწყდათ და უკვე მეორის მიღების დროა, მიიღეთ მხოლოდ მომდევნო დოზა.
ასევე, დაუშვებელია მკურნალობის თვითნებურად შეწყვეტა — რაიმე დისკომფორტის, გვერდითი მოვლენების შემთხვევაში მიმართეთ მკურნალ ექიმს.
რა შესაძლო გვერდითი მოვლენები აქვს პრეპარატს?
ისევე, როგორც სხვა ნებისმიერმა პრეპარატმა, კეტოტიფენმაც შეიძლება გამოიწვიოს გვერდითი ეფექტები. ეს შესაძლოა, იყოს:
- გამონაყარი კანზე, კანის სიწითლე, ტუჩის დახეთქილობა, ბუშტების წარმოქმნა კანზე, თვალებზე, პირის ღრუში და სასქესო ორგანოებზე, თანამდევი მაღალი ტემპერატურით, ცხელებით, თავის ტკივილი, ხველა და ტკივილი მთლიან სხეულზე;
- აღგზნებადობა, გაღიზიანება, უძილობა, შფოთვა, თავბრუსხვევა;
- წვის შეგრძნება შარდვისას, ხშირი შარდვა (ცისტიტი);
- პირის სიმშრალე;
- ძილიანობა;
- წონაში მატება;
- კანის ან თვალების სიყვითლე, განავლის გაფერმკრთალება, შარდის გამუქება (სიყვითლის, ჰეპატიტის ნიშნები);
- ძალიან იშვიათ შემთხვევებში მკურნალობისას გამოვლინდა კრუნჩხვა.
ნებისმიერი ჩივილისა თუ გვერდითი მოვლენის შესახებ დროულად აცნობეთ ექიმს.
დაშვებულია თუ არა კეტოტიფენის გამოყენება ბავშვებში?
კეტოტიფენის ბავშვებში გამოყენება ექიმის რეკომენდაციითა და ზედამხედველობით დაშვებულია. თუმცა თვითმკურნალობა არ შეიძლება. მნიშვნელოვანია იმის გათვალისწინება, რომ მკურნალობის კურსი არ უნდა აღემატებოდეს 2-3 თვეს და მიმდინარეობდეს ექიმის მეთვალყურეობით.
შეიძლება ახლობლებისა თუ მეგობრებისგან მოისმინოთ შეხედულება, რომ ნახევარი ტაბლეტი კეტოტიფენი, ან სიროფი ბავშვს არ ავნებს და თამამად შეგიძლიათ მოხმარება — ეს შეხედულება მცდარია. მისი ძლიერი მოქმედების გამო კეტოტიფენის პატარებთან გამოყენება თვითნებურად არ შეიძლება და მის დანიშვნამდე სხვადასხვა ალერგიული რეაქციები, თუ უკუჩვენებები უნდა გამოირიცხოს. ეს კი ექიმის ჩარევის გარეშე ვერ მოხდება.
ვინ არ უნდა მიიღოს კეტოტიფენი?
პირველ რიგში, უნდა გვახსოვდეს, რომ კეტოტიფენი ხშირად იწვევს ძილიანობას და ანელებს რეაქციების გამოვლენას. ამიტომაც ავტოტრანსპორტის მართვისა და სხვა მექანიკურ საშუალებებთან მუშაობის დროს განსაკუთრებული სიფრთხილე უნდა გამოვიჩინოთ.
ასევე არ უნდა მიიღონ კეტოტიფენი ორსულებმა, განსაკუთრებით პირველ ტრიმესტრში. მეორე და მესამე ტრიმესტრში კი გადაწყვეტილება უნდა მიიღოს ექიმმა — წამლით მიღებული სარგებელი უნდა აღემატებოდეს იმ საფრთხეებს, რასაც მედიკამენტი ნაყოფისთვის შეიძლება შეიცავდეს.
რაც შეეხება ლაქტაციაზე მყოფ დედებს — კვლევებით დგინდება, რომ კეტოტიფენის აქტიური ინგრედიენტი აღწევს დედის რძეში. ამიტომაც ამ პერიოდში დედის მიერ წამლის მიღება არ შეიძლება.
