კომპანია „ფოლად იოლი“-ს საწარმოში დასაქმებულებმა გამაფრთხილებელი საპროტესტო აქცია გამართეს. დაახლოებით 200-მა ადამიანმა მუშაობაზე უარი განაცხადა, რის მიზეზადაც ხელფასების ექვსთვიანი დაგვიანება და კომპანიის მხრიდან დაპირებების შეუსრულებლობა სახელდება.
გაფიცულთა თქმით, ისინი კომპანიას ხელფასების გადახდას არაერთხელ სთხოვდნენ, თუმცა უშედეგოდ — ანაზღაურების საკითხი გაურკვეველი ვადით იწევდა.
პროტესტის ნიშნად გაფიცულებმა გადაკეტეს ბათუმი-ქობულეთის ცენტრალური საავტომობილო გზა. საავტომობილო მოძრაობა მხოლოდ მას შემდეგ აღდგა, რაც ადგილზე გურიის გუბერნატორისა და სამხარეო პოლიციის სრული შემადგენლობა ჩავიდა.
აქციას ესწრებოდა უფლებადამცველი თამაზ ბაკურიძე, რომელმაც გაფიცულებთან ერთად შეხვედრა გამართა კომპანიის წარმომადგენლებთან. ბაკურიძის განცხადებით, კომპანიამ დაპირება გასცა, რომ დასაქმებულებს ხელფასებს ან მომდევნო სამშაბათამდე, ან ბაირამის დასრულებისთანავე გადაუხდის.
მისი ინფორმაციით, საწარმოში დასაქმებული არიან საქართველოს, თურქეთისა და აზერბაიჯანის მოქალაქეები, რომელთა შრომითი უფლებები სისტემურად ირღვევა.
„ეს არ არის პირველი შემთხვევა. კომპანიის მენეჯმენტი უგულებელყოფს როგორც საქართველოს შრომის კანონმდებლობას, ისე ადამიანურ დამოკიდებულებას საკუთარი თანამშრომლების მიმართ“, — განაცხადა ბაკურიძემ.
