ზაფხული საუკეთესო დროა სხვადასხვა აქტივობებში მონაწილეობისთვის, განსაკუთრებით იმ ახალგაზრდებისთვის, რომლებიც საზღვარგარეთ სწავლას გეგმავენ. ამერიკული და ევროპული უნივერსიტეტები დიდი ინტერესით ეცნობიან, თუ რამდენად აქტიურია ახალგაზრდა, რამდენად საინტერესო და მნიშვნელოვანი ცვლილებები შეაქვს მის ირგვლივ მყოფ საზოგადოებაში და რამდენად არის განვითარებაზე ორიენტირებული.
ხშირად, აქტივობები განსაზღვრავს უნივერსიტეტებში მოხვედრას, ამიტომაც გთავაზობთ სავარაუდო აქტივობების ჩამონათვალს, რაც გაგიადვილებთ მოიფიქროთ, რისი გაკეთება შეგიძლიათ ამ ზაფხულს.
– მოხალისეობრივი საქმიანობა და ქველმოქმედება – მიმოიხედეთ ირგვლივ, შესაძლებლობებია და რისი გაკეთება შეგიძლიათ? ვის შეგიძლიათ უანგაროდ დაეხმაროთ? რა როლი შეიძლება შეითავსოთ და არგოთ გარემოს თუ გარშემომყოფთ? მოხალისეობრივი აქტივობები შეიძლება იყოს – პარკისა თუ პლაჟის დალაგება/დასუფთავება; ინგლისურის, ქართულის თუ სხვა საგნის მოწყვლადი ჯგუფებისთვის სწავლება; ფესტივალების ორგანიზებაში ჩართვა, კვლევებში მონაწილეობა და სხვა. ცხოველების მოვლა-პატრონობა; მეწარმეებისთვის, ხელოვანებისთვის დახმარება; რომელიმე სფეროში პროფესიონალთა ასისტენტობა; წიგნების/სათამაშოების/საკვების შეგროვება, სწავლება, ცოდნის გაზიარება და სხვა.
– სპორტულ ღონისძიებებში მონაწილეობა – თუ სპორტით ხართ დაკავებული, ბუნებრივია ზაფხულში ბევრი საინტერესო შეჯიბრი შეიძლება მოეწყოს, მაგრამ თუ არ ხართ სპორტით დაკავებული, შეგიძლიათ მოხალისეობრივი სპორტული გარბენები მოაწყოთ. ასევე შეგიძლიათ ინიციატორი გახდეთ ჯანსაღი ცხოვრების წესის დამკვიდრების მიზნით გარკვეული აქტივობების. ნუ გგონიათ, რომ აუცილებლად ეს ყველაფერი მასშტაბური უნდა იყოს. თუ ერთ ადამიანს მაინც დაარწმუნებთ, რომ აღარ მოსწიოს, დაკავდეს სპორტით, ივარჯიშოს ყოველდღიურად, ესეც უკვე ბევრს ნიშნავს.
– ხელოვნება – თუ გაქვთ ხელოვნებისადმი მიდრეკილება და რაიმე ნიჭი, ხატავთ, უკრავთ ინსტრუმენტზე, ცეკვავთ, მღერით, დიზაინს ქმნით – შეგიძლიათ წარმოაჩინოთ და აქტივობად ჩაითვალოთ. თუ არა და ამ შემთხვევაში სხვა ადამიანების ხელოვნებით დაინტერესებაც საქმეა. ახლა ძალიან გავრცელებულია ფილმები კატეგორიზება, რომელი ფილმი რატომ უნდა ნახოს ადამიანმა, რატომ მოსწონთ ესა თუ ის მუსიკა სხვადასხვა ასაკის და კულტურის ადამიანებს, რა წიგნები უნდა წაიკითხოს ადამიანმა, რას გვაძლევს თითოეული მათგანი. შეგიძლიათ დაიწყოთ ამაზე საუბარი, გამართოთ სამეგობროში დისკუსიები, ერთად უყუროთ და განიხილოთ სპექტაკლები, ხელი შეუწყოთ ნიჭიერი ადამიანების წარმოჩენას და მათ შესახებ ინფორმაციის გავრცელებას. იფიქრეთ, ეს ყველა ნაბიჯი ხელოვნებისადმი სიყვარულის განვითარებას მოიცავს და საზოგადოების აზროვნების ხელშეწყობას უწყობს ხელს.
– ფოტოგრაფია – დღეს ყველაზე საინტერესო და ადვილად ათვისებადი მიმართულებაა. რა თქმა უნდა, ყველა პროფესიონალი ვერ ვიქნებით, მაგრამ ყოველთვის შეიძლება საინტერესოდ შემოვატრიალოთ გარემოს ფოტოგრაფირება. მაგალითად, ალბათ ყველა ქალაქსა თუ სოფელში არის რაიმე განსაკუთრებული ტრადიცია, არქიტექტურა, ბუნება, საკვები, დაიწყეთ ფოტოგრაფირება ამ ყოველივეს, იქნებ დაიაროთ და ქალაქში არსებული ძველი კარები გადაიღოთ, ძეგლები ან კიბეები, განსხვავებული არქიტექტურის სახლები, მდინარის თუ ზღვის სანაპიეროები. მიმოიხედეთ, ბევრი რამ გამოჩნდება, რასაც სხვა ყურადღებას არ აქცევს და რეალურად საინტერესოა. სად წავიღოთ ეს ფოტოები? შევაგროვოთ და სოციალურ მედიაში გამოვფინოთ. ასევე გადაუგზავნეთ ადგილობრივ ან ცენტრალურ მედია საშუალებებს, ისინიც დაინტერესდებიან, თქვენ კი ამ საინტერესო კონტენტის შემქნელი და ავტორი იქნებით, რაც საამაყოა.
– დებატებსა და დისკუსიებში მონაწილეობა – ზაფხულში ბევრია საზაფხულო სკოლა, თუმცა უმრავლესობა ფასიანია. თუ ამის შესაძლებლობა არ გავქვს, შეიკრიბეთ მეგობრები და დაგეგმეთ რაიმე საგანმანათლებლო აქტივობა. ეს შეიძლება რომელიმეს სახლში, საჯარო ადგილას, ბიბლიოთეკაში, კაფეში, სტადიონზე, სკვერში გააკეთოთ. ან სულაც სოციალურ ქსელში, ონლაინ. მთავარია აქტივობა იყოს საგანმანათლებლო და განმავითარებელი. დაუგეგმეთ ექსკურსიები პატარებს ან თანატოლებს, გაეცით ცოდნა, გაუზიარეთ რაც იცით, მოახდინეთ საუბრის ინიცირება. ეს ყოველივე საინტერესოა და სახალისოც. მთავარია იყოს მიზანმიმართული და თანმიმდევრული. ერთჯერადი შეხვედრა შედეგზე ვერ გაგვიყვანს.
– გადმოსავლის ძიება – იფიქრეთ პრობლემებზე, რაც თქვენს სამეგობროს, სამეზობლოს, ქალაქსა თუ სოფელს აქვს. რა შეიძლება გაკეთდეს მათ გადასაჭრელად? ვის უნდა მივმართოთ? ჩაატარეთ მცირე კვლევა, გამოკითხეთ სხვებიც, რას ფიქრობენ. წარაწდგინეთ თუნდაც ამ კვლევის შედეგები მერიაში, მუნიციპალიტეტში, დაელაპარაკეთ ადგილობრივ მთავრობას. ინფორმაციის მიწოდება – უკვე საქმეა. თუ თქვენი ინიციატივით გადაიჭრა პრობლემა, ხომ კარგი, თუმცა მცდელობაც უკვე მისაბაძია.
– ოლიმპიადებში, ჰაკათონებსა და სხვა საგანმანათლებლო კონკურსებში მონაწილეობაზე ბევრს არ ვისაუბრებ, ისეც გეცოდინებათ. სამეცნიერო მიღწევები და გამოგონებები თუ გაქვთ, ბუნებრივია, მათზე ისაუბრებთ.
– სარგებლის მოტანა, დახმარება ახლობლებზე – თუ ირგვლივ ვინმეს დახმარება სჭირდება, მათ შორის მშობლებს, ბებია-ბაბუას, მეზობელს, ნათესავს. მიწა აქვს დასამუშავებელი, საყიდლებზე არის წასასვლელი, მურაბა აქვს გასაკეთებელი 🙂 ან ნებისმიერი საქმე, რომელსაც თქვენ გაუკეთებთ ადამიანს, რომელსაც სჭირდება და თავად ვერ აკეთებს. თუ ადამიანს სურს სხვა რამ აკეთოს და ვერ იცლის, მაგრამ თქვენი დახმარება ხელს შეუწყობს სხვა უფრო საინტერესო საქმის კეთებაში, ესეც სასარგებლო აქტივობაა და იმაზე მიანიშნებს, რომ უნივერსიტეტსაც წაადგებით საჭიროების შესაბამისად.
დაგვიწერეთ თქვენ, რა აქტივობებზე ფიქრობთ და გიპასუხებთ, რამდენად კარგი იდეაა და როგორ შეაფასებს მას უნივერსიტეტის მიმღები კომისია.
ავტორი: ნათია სირაბიძე, მეცნიერებათა დოქტორი, ამერიკული აკადემიის დამფუძნებელი.
მასალა გამოქვეყნებულია მოსაზრებების კატეგორიაში, შესაბამისად მის შინაარსზე სრულად პასუხისმგებელი ავტორია.
