ფინანსთა სამინისტროს საგამოძიებო სამსახურმა უაქციზო ალკოჰოლის უკანონო შენახვა-რეალიზაციის ფაქტზე რუსეთის ფედერაციის მოქალაქე დააკავა.
უწყების ინფორმაციით, ოპერატიულ-სამძებრო ღონისძიებებისა და საგამოძიებო მოქმედებების შედეგად დადგინდა, რომ ბრალდებულმა, მატერიალური სარგებლის მიღების მიზნით, უკანონოდ შეინახა და გაასაღა აქციზური მარკის სავალდებულო დართვას დაქვემდებარებული ალკოჰოლური სასმელი „BELUGA“.
გამოძიების ცნობით, პირი უაქციზო პროდუქციის რეალიზაციისთანავე დააკავეს. ამ ეტაპზე გრძელდება საგამოძიებო მოქმედებები დანაშაულში შესაძლო მონაწილე სხვა პირების გამოვლენისა და პასუხისმგებლობის დაკისრების მიზნით.
საქმეზე გამოძიება საქართველოს სისხლის სამართლის კოდექსის 200-ე მუხლის მე-3 ნაწილით მიმდინარეობს, რაც 6-დან 8 წლამდე ვადით თავისუფლების აღკვეთას ითვალისწინებს.
