ბათუმის საკრებულო მომდევნო სხდომაზე ქალაქის ადმინისტრაციული საზღვრების შესაძლო ცვლილების საკითხზე დროებითი სამუშაო ჯგუფის შექმნას განიხილავს.
საკრებულოში წარმოდგენილი პროექტის მიხედვით, სამუშაო ჯგუფი ბათუმის მუნიციპალიტეტის ადმინისტრაციული საზღვრების შეცვლის შესახებ შუამდგომლობის მომზადების ორგანიზებისთვის შეიქმნება და სამი თვის ვადით იმუშავებს.
განმარტებითი ბარათის თანახმად, საკითხი მას შემდეგ დადგა დღის წესრიგში, რაც ბათუმის საკრებულომ ხელვაჩაურის მუნიციპალიტეტის საკრებულოსგან შესაბამისი მომართვა მიიღო. დოკუმენტის მიხედვით, ხელვაჩაურმა უკვე შექმნა სამუშაო ჯგუფი, რომელიც ადმინისტრაციული საზღვრების ცვლილების საკითხს შეისწავლის. საუბარია ბათუმის მუნიციპალიტეტის ადმინისტრაციული საზღვრების გარკვეულ ნაწილზე, რომელიც შესაძლოა ხელვაჩაურის მუნიციპალიტეტის ადმინისტრაციულ საზღვრებში მოექცეს.
პროექტის ავტორების განმარტებით, საკითხი საჭიროებს დეტალურ შესწავლას, კარტოგრაფიული მასალების დამუშავებას, მოსახლეობასთან კონსულტაციების ჩატარებასა და შესაბამისი სამართლებრივი დოკუმენტაციის მომზადებას.
ამ ეტაპზე დაკონკრეტებული არ არის, ბათუმის რომელი ტერიტორიის დაბრუნებას ითხოვს ხელვაჩაური.
