ბათუმში, წარსულში არსებული კონფლიქტის ნიადაგზე, კაცი ე.წ. აბრეზიდან გასროლით დაჭრეს. შინაგან საქმეთა სამინისტროს აჭარის პოლიციის დეპარტამენტის ცნობით, ბრალდებული ცხელ კვალზე დააკავეს.
გამოძიების ინფორმაციით, ბრალდებულმა მეზობლად მცხოვრებ კაცს გადაჭრილი თოფიდან ესროლა და ქვედა კიდურის არეში დაჭრა.
დაჭრილი კლინიკაში გადაიყვანეს. სავარაუდო დამნაშავე შემთხვევის ადგილის სიახლოვეს დააკავეს. პოლიციამ დანაშაულის ჩადენის იარაღი ნივთმტკიცებად ამოიღო.
გამოძიება ჯანმრთელობის განზრახ ნაკლებად მძიმე დაზიანებისა და ცეცხლსასროლი იარაღის უკანონო შეძენა-შენახვა-ტარების ფაქტებზე, სისხლის სამართლის კოდექსის 118-ე და 236-ე მუხლებით მიმდინარეობს, რაც 7 წლამდე ვადით თავისუფლების აღკვეთას ითვალისწინებს.
