საზღვარგარეთ სწავლა აქტუალურია, თუმცა ყოველთვის რჩება სკეპტიციზმი, ვაითუ ვერ ჩავაბარო, ვაითუ ვერ მივიღო დაფინანსება, ვაითუ ვიზა ვერ ავიღო და ა.შ. ამიტომაც გთავაზობთ დროის სწორად გადანაწილების სტრუქტურას, რაც გამოგადგებათ სამომავლოდ საზღვარგარეთ ბაკალავრიატის დაგეგმაში.
საზღვარგარეთ სწავლის დაგეგმვა სასურველია დავიწყოთ სულ მცირე მე-11 კლასში, ვინაიდან ინგლისური ენის გარდა, სასურველია ჩავაბაროთ SAT ტესტი, რომელიც ძირითადად ინგლისურ ვერბალურ და მათემატიკურ ნაწილს მოითხოვს, ასევე, წინასწარ უნდა დავაგროვოთ დაახლოებით 10 აქტივობა, რომელზეც ჩვენს სამოტივაციო წერილში ვისაუბრებთ და აპლიკაციაში მივუთითებთ.
პირველი განაცხადი უმოჯესია ამერიკულ უნივერსიტეტში გავაგზავნოთ. ყოველი წლის პირველ ნოემბერს არის ბოლო ვადა ე.წ. ადრეული გადაწყვეტილების (Early Decision) აპლიკაციის გაგზავნისთვის. რას გულისხმობს ეს? ეს ნიშნავს, რომ ვარჩევთ ჩვენთვის საოცნებო და ადრეული გადაწყვეტილებით ვეუბნებით, რომ უპირატესი ეს უნივერსიტეტია და თუ მიგვიღეს, იქ სწავლაზე უარს ვეღარ ვიტყვით.
ადრეული გადაწყვეტილების პასუხი ხშირად დეკემბრის შუა რიცხვებში მოდის, სანამ სხვა უნივერსიტეტებში გადავაგზავნით. თუ არ მიგვიღეს, თავისუფლად შეგიძლიათ გადააგზავნოთ კიდევ 19 ამერიკულ უნივერსიტეტში, როგორც რეგულარული გადაწყვეტილება (regular decision). უნივერსიტეტების შერჩევა რა კრიტერიუმებით უნდა შევარჩიოთ, ამის შესახებ შემდეგ სტატიაში ვისაუბრებთ.
ამერიკულ უნივერსიტეტებში განაცხადებს ვაგზავნით 15 დეკემბრიდან, 15 იანვრის ჩათვლით, შემდეგ უკვე იშვიათად აქვთ მიღება. პასუხებს კი შემდეგი წლის მარტ-აპრილში მივიღებთ.
ამ დროისათვის, ვინაიდან საერთო აპლიკაცია არ აქვთ ევროპის უნივერსიტეტებს, ჩვენ გვაქვს შესაძლებლობა იქაც დავაგზავნოთ. ან კიდევ დაველოდოთ ამერიკული უნივერსიტეტების პასუხებს და 15 აპრილამდე გადავაგზავნოთ ევროპულ უნივერსიტეტებში.
ამერიკული და ევროპული უნივერსიტეტების საბოლოო პასუხები აუცილებლად გვექნება პირველ მაისამდე. თუ არც ერთი მათგანი არ მოგვწონს ან ჩვენთვის მისაღები პირობები არ არის, ამ შემთხვევაში დრო გრჩებათ გადახედოთ საქართველოს ეროვნულ გამოცდებს და აბაროთ.
თუ თქვენ ამერიკულ და ევროპულ უნივერსიტეტებზე ხართ ორიენტირებულები, აპრიორ ნიშნავს, რომ მახსოვრობის და აზროვნების კარგი უნარებით გამოირჩევით, რაც ეროვნულ გამოცდებში უპირატესია და ზღვარის გადალახვას ყველა საგანში შეძლებთ. ამ სტრუქტურით, თქვენ შეძლებთ ყველა შანსის გამოყენებას და საბოლოო გადაწყვეტილების მიღებას.
ავტორი: ნათია სირაბიძე, მეცნიერებათა დოქტორი, ამერიკული აკადემიის დამფუძნებელი.
მასალა გამოქვეყნებულია მოსაზრებების კატეგორიაში, შესაბამისად მის შინაარსზე სრულად პასუხისმგებელი ავტორია.
