აჭარის განათლების მინისტრის მოადგილე აკაკი ძნელაძე თანამდებობიდან გათავისუფლდა. ინფორმაცია უწყების პრესსამსახურში დაგვიდასტურეს. სამინისტროში განმარტავენ, რომ გათავისუფლების მიზეზზე საუბარი ამ ეტაპზე არ შეუძლიათ.
მიუხედავად იმისა, რომ ოფიციალურად განმარტება არ გაკეთებულა, “აჭარა თაიმსს” რამდენიმე ერთმანეთისგან დამოუკიდებელმა წყარომ მიაწოდა ინფორმაცია, რომ გადაწყვეტილება შეიძლება უკავშირდებოდეს აკაკი ძნელაძესა და აჭარის კულტურის მინისტრის მოადგილე ლადო მგალობლიშვილს შორის მომხდარ ფიზიკურ დაპირისპირებას.
წყაროების ცნობით, ინციდენტი რამდენიმე დღის წინ, აჭარის მწერალთა სახლის მიმდებარე ტერიტორიაზე მოხდა. მოქალაქეთა თქმით, ისინი ფიზიკური დაპირისპირების თვითმხილველებიც გახდნენ. კონფლიქტის მიზეზად თანამდებობრივი განხილვები და “პოზიციების ვერგაყოფა” სახელდება.
დაპირისპირებასთან დაკავშირებით აკაკი ძნელაძე კომენტარს არ აკეთებს. „გამორიცხულია“ — ასე გვიპასუხა მან დაპირისპირების შესახებ დასმულ კითხვაზე, რის შემდეგაც საუბარი შეწყვიტა და ტელეფონი გაგვითიშა. ორდღიანი, არაერთი მცდელობის მიუხედავად, ლადო მგალობლიშვილმა ჩვენს სატელეფონო ზარებს არ უპასუხა.
