კლინიკა BMC-ში ბარიატრიული ოპერაციის მოლოდინში მოთავსებული პაციენტი უკვე მეექვსე დღეა მკაცრ შიმშილობაზეა, მას მხოლოდ წყლის მიღების უფლება აქვს.
ოჯახის ახლობლები ექიმის მხრიდან უყურადღებობასა და არაჯანსაღ კომუნიკაციაზე მიუთითებენ.
როგორც “აჭარა თაიმსთან” ახლობელი აცხადებს, ოპერაცია სახელმწიფო პროგრამის ფარგლებში ფინანსდება, რადგან პაციენტი სოციალურად დაუცველია. თანხა სამინისტრომ უკვე გადაიხადა, თუმცა, ოპერაციის ჩატარების ზუსტი დრო ჯერ კიდევ ბუნდოვანია.
„ექვსი დღეა, პაციენტს მხოლოდ წყალს აძლევენ და ამბობენ, რომ ოპერაციას დღეს-ხვალ ჩაუტარებენ. თუმცა, კონკრეტული პასუხი ვერ მივიღეთ. ექიმი მუდმივად ცვლის მიზეზებს – ხან უშუქობას ასახელებს, ხან მოუცლელობას. იმავდროულად, ამ პერიოდში რამდენიმე სხვა პაციენტს ჩაუტარდა ანალოგიური ოპერაცია,“ – ამბობს ოჯახის ახლობელი.
მისივე თქმით, მკურნალი ექიმი ურთიერთობისას ხშირად შეურაცხმყოფელი ტონით საუბრობს, რაც ოჯახის წევრებისთვის დამატებით სტრესს იწვევს.
„ცუდად გვესაუბრება. კონკრეტულ პასუხს ვერ გვაძლევს და თითქოს არც სცალია ჩვენთვის. ვერ ვიგებთ, რატომ ჭიანურდება ოპერაცია, როცა ფინანსური საკითხი გადაწყვეტილია.“
ოჯახი ითხოვს, პაციენტს ოპერაცია უმოკლეს ვადაში ჩაუტარდეს, ხოლო კლინიკის ადმინისტრაციამ დეტალურად განმარტოს შეფერხების მიზეზები.
ჩვენ დავუკავშირდით კლინიკა BMC-ის, კომენტარის მიღების შემთხვევაში მასალა განახლდება.
განახლება: მასალის გამოქვეყნების შემდეგ დაგვიკავშირდა ქალი, რომელმაც თავი პაციენტის შვილად წარგვიდგინა. მისი თქმის თანახმად, სამედიცინო მომსახურებასთან დაკავშირებით ექიმთან, ასევე, კლინიკასთან პრეტენზია არ გააჩნიათ და რომ ინფორმაციის ჩვენთვის შეტყობინება ოჯახთან შეთანხმების გარეშე მოხდა.
