მულტიმედია

აჭარა თაიმსი • The Ajara Times

აჭარა თაიმსი • The Ajara Times
ქობულეთში, ე.წ. ემტეესის დასახლებაში, რიგით მეორე საპროტესტო აქცია გაიმართა. ტერიტორიაზე, სადაც სპორტკომპლექსის მშენებლობა იგეგმება, მძიმე ტექნიკით სამუშაოები მიმდინარეობს. მათი თქმით, მიწის ნაკვეთები, რომლებზეც დღეს სამუშაოები დაიწყო, მათი წინაპრების საკუთრება იყო და ტერიტორიაზე სამუშაოები უკანონოდ მიმდინარეობს. რვა ოჯახი აცხადებს, რომ ძველ საარქივო დოკუმენტებზე დაყრდნობით, აღნიშნული მიწის ნაკვეთები მათ საკუთრებაში იყო. მათი თქმით, 2000-2007 წლებამდე მიწებს სახნავ-სათესად იყენებდნენ, თუმცა წინა ხელისუფლების პირობებში ტერიტორიით სარგებლობის უფლება შეეზღუდათ. ადგილობრივების განცხადებით, „ქართული ოცნების“ ხელისუფლებაში მოსვლის შემდეგაც განაგრძობდნენ მიწების გამოყენებას, თუმცა ახლა ამ შესაძლებლობასაც აღარ აძლევენ. პროტესტის მონაწილე რვა ოჯახი მიწის ნაკვეთების დასარეგისტრირებლად აღიარების კომისიასა და საჯარო რეესტრს მიმართავს და საკითხის სამართლებრივი გზით მოგვარებას ცდილობს. როგორც ისინი აცხადებენ, ამ დროისთვის სამ ოჯახს საჯარო რეესტრში განცხადება წარმოებაში აქვს და მიწის ნაკვეთების რეგისტრაციის გადაწყვეტილებას ელოდება. აქციის მონაწილეები აცხადებენ, რომ აქვთ ინფორმაცია ბიზნესმენ და პარლამენტარ გია ჭყონიას ინტერესის შესახებ. მათი ვარაუდით, მიწის ნაკვეთების მიმართ ინტერესი შესაძლოა უკავშირდებოდეს მის მახლობლად მდებარე ტურისტულ კომპლექს. ადგილობრივების მტკიცებით, ტენდერში გამარჯვებული კომპანია ბიზნესმენის ინტერესებს ემსახურება. ტერიტორიაზე სპორტკომპლექსის მშენებლობისთვის ელექტრონული ტენდერი მუნიციპალური განვითარების ფონდმა გამოაცხადა. სამუშაოებს შპს „ქრეათივ ინფრეშენს კავკასუსი“ ასრულებს. კომპანიის წარმომადგენლის განცხადებით, მოსახლეობის პროტესტის გამო მძიმე ტექნიკის გამოყენებით სამუშაოები დღეს დროებით შეჩერდა. „ამ მიწის ნაკვეთზე სპორტკომპლექსი უნდა აშენდეს. ბიზნესმენ გია ჭყონიასთან არანაირი შემხებლობა არასდროს გვქონია“, - განუცხადა კომპანიის წარმომადგენელმა „აჭარა თაიმსს“. პროტესტის მონაწილე ოჯახების თქმით, წარსულში მათ ტერიტორიაზე საცხოვრებელი კომპლექსის მშენებლობის მიზნით კერძო ინვესტორიც მოიძიეს. მათი განცხადებით, პროექტი მოსახლეობის ინტერესებს სრულად ითვალისწინებდა, თუმცა ქობულეთის მერიამ მისი განხორციელება მიზანმიმართულად ჩაშალა. აქციის მიმდინარეობისას ადგილზე იმყოფებოდნენ ქობულეთის პოლიციის უფროსი და ქობულეთის მერიის მუნიციპალური ინსპექციის წარმომადგენლები. მათ „აჭარა თაიმსთან“ კომენტარი არ გააკეთეს. პროტესტის მონაწილეები აცხადებენ, რომ უკან დახევას არ აპირებენ, აქციებს მომავალშიც გამართავენ და საკუთარი უფლებების დასაცავად სასამართლოს მიმართავენ. „აჭარა თაიმსი“ ქობულეთის მერიის საზოგადოებასთან ურთიერთობის სამსახურისგან ელოდება კომენტარს მოსახლეობის პროტესტისა და ტერიტორიაზე სამუშაოების დაწყების საფუძვლების შესახებ. იმ შემთხვევაში, თუ ბრალდების ადრესატი, გია ჭყონია, კომენტარს გააკეთებს, მასალა განახლდება.
ქობულეთში 8 ოჯახი მიწის ნაკვეთების გამო პროტესტს აგრძელებს
რა საჭიროებები აქვთ ქობულეთის სოფლებში მცხოვრებლებს - გამოკითხვა
რა საჭიროებები აქვთ ქობულეთის სოფლებში მცხოვრებლებს - გამოკითხვა
სოფელ დაგვაში მცხოვრები 86 წლის იოსებ კარაპუტაძე უკვე ნახევარი საუკუნეა, სპეციალურად შერჩეული ხის მასალისგან გოდრებსა და კალათებს ამზადებს. მისი ხელობა დღეს სულ უფრო იშვიათი ხდება. გოდრის დამზადება მარტივი საქმე არ არის. საჭირო ხის მასალის მოპოვებასა და მომზადებას იოსებ კარაპუტაძე ყოველწლიურად, შემოდგომაზე იწყებს. ხის შერჩევა, დამუშავება, წნელების მომზადება და შემდეგ მათი სათითაოდ დაწნვა დიდ დროს, ფიზიკურ შრომასა და მრავალწლიან გამოცდილებას მოითხოვს. 86 წლის ოსტატისთვის ეს მხოლოდ შემოსავლის წყარო არ არის. გოდრებისა და კალათების დამზადება მისი ცხოვრების ნაწილია, ხელობა, რომელსაც ახალგაზრდობიდან მოჰყვება და უკვე 50 წელია, მისი ყოველდღიურობის განუყოფელი ნაწილია. ოსტატი ამბობს, რომ ასაკის მატებასთან ერთად მუშაობა უფრო უჭირს. ხელები ისე სწრაფად და მარტივად ვეღარ ემორჩილება, როგორც წლების წინ, გოდრის დაწვნას კი დიდი ძალისხმევა მოითხოვს. გვიყვება, რომ წელს გოდრებისა და კალათების მყიდველი ნაკლები იყო. მიუხედავად ამისა, ოსტატი საქმიანობას არ წყვეტს. ყოველდღე, დილის 8 საათიდან საღამოს 6 საათამდე, ის ქობულეთის ცენტრალური ბაზრის მიმდებარედ გზაგამყოფზე დგას და საკუთარი ხელით დამზადებულ ნივთებს ყიდის. მისი ძირითადი მყიდველები ადგილობრივები არიან, თუმცა გოდრებითა და კალათებით ტურისტებიც ინტერესდებიან. განსაკუთრებით მოსწონთ პატარა, მინიატურული გოდრები, რომლებსაც ქართული ტრადიციული ხელობის ნიმუშებად ყიდულობენ. იოსებ კარაპუტაძე ამბობს, რომ ახალგაზრდა თაობას ამ საქმისადმი ინტერესი ნაკლებად აქვს. სწორედ ეს არის მისი ყველაზე დიდი დარდი, შიშობს, რომ მას შემდეგ, რაც თავად მუშაობას ვეღარ შეძლებს, შესაძლოა, აღარავინ აღმოჩნდეს, ვინც მის ცოდნასა და გამოცდილებას აითვისებს, გააგრძელებს და ამ ტრადიციას შეინარჩუნებს. მიუხედავად ასაკისა, ოსტატი ყოველდღე ისევ თავის ადგილას დგას. არც ქუჩის ხმაური აშინებს, არც წვიმა და ქარი. აგრძელებს საქმეს, რომელსაც ნახევარი საუკუნე მიუძღვნა და რომლის მომავალიც დღეს გაურკვეველია.
86 წლის მეგოდრე ქობულეთიდან
„დინამო თბილისსა“ და ყაზახურ გუნდს შორის U15 კატეგორიის ფეხბურთის მატჩის მიმდინარეობისას ფიზიკური დაპირისპირება მოხდა. მატჩი ქობულეთში, „ჩელე არენაზე“ გაიმართა. ინციდენტის შემდეგ პირდაპირი ტრანსლაცია შეწყდა, თუმცა „აჭარა თაიმსმა“ კონფლიქტის ამსახველი დამატებითი ვიდეომასალა მოიპოვა. ჩვენი ინფორმაციით, დაპირისპირებას წინ ქართველ ფეხბურთელთა და საქართველოს მიმართ სიტყვიერი შეურაცხყოფა და გინება უძღოდა. კონფლიქტის დროს ფეხბურთელები სხვადასხვა საგანსაც ისროდნენ. მიუხედავად მომხდარისა, ორგანიზატორებს მატჩი არ შეუწყვეტიათ. ამასთან, ყაზახური გუნდი ტურნირს არ ჩამოუშორებიათ და ფინალში გადაიყვანეს. მატჩის ორგანიზატორი აჭარის ფეხბურთის ფედერაცია იყო.
ქობულეთში, ქართველ და ყაზახ ფეხბურთელებს შორის ფიზიკური დაპირისპირება მოხდა
ავსტრიის ქალაქ ზალცბურგში მცხოვრებმა აჭარიდან წასულმა ემიგრანტებმა ბანკის მიერ შეცდომით გაცემული თანხა უკან დააბრუნეს. ერთ-ერთი სტუდენტი ბანკში ვიზისთვის წარდგენილი 12 000 ევროს გამოსატანად მივიდა, თუმცა ბანკის თანამშრომლებმა მას შეცდომით 120 000 ევრო გადასცეს. ემიგრანტებმა მოგვიანებით თანხა უკან დააბრუნეს.
ემიგრანტებმა ბანკის მიერ შეცდომით გაცემული თანხა უკან დააბრუნეს
☕️ ლალისთან ყავაზე - უფასოდ ბათუმში, გორგილაძის ქუჩის N54-ში, ერთი პატარა სივრცე გაჩნდა, სადაც ყავის დალევა სრულიად უფასოდ შეგიძლიათ. ლალი ანთიძის საკვირაო სკოლის შესასვლელთან მოწყობილ სივრცეში დაგხვდებათ პატარა მაგიდა, ორი სკამი, ყავა, წყალი, შაქარი და ქვიშის აპარატი. აქ ყავას თქვენთვის სხვა არავინ მოამზადებს, მას თავად მოხარშავთ. შეგიძლიათ თავად გადაწყვიტოთ, როგორი ყავა გსურთ და ქვიშაზე ნელ-ნელა მოამზადოთ. ქვიშაზე მოხარშულ ყავას კი თავისი განსაკუთრებული ხიბლი და არომატი აქვს. პროექტს „ლალისთან ყავაზე, უფასოდ“ ჰქვია და, როგორც ლალი ანთიძე ამბობს, ეს მისი პატარა საჩუქარია ბათუმისთვის. ☕️ თუ სურვილი გაქვთ, იქვე განთავსებულ ყულაბაში თანხის დატოვებაც შეგიძლიათ, რამდენს გაიღებთ, ამას თავად გადაწყვეტთ. თუ თანხის დატოვების შესაძლებლობა არ გაქვთ, არც ეს არის პრობლემა, ყავას მაინც უფასოდ დააგემოვნებთ. ეს სივრცე მხოლოდ ყავისთვის არ არის. აქ ლალი პოდკასტების სერიასაც წერს, რომელსაც „ლალისთან ყავაზე“ ჰქვია, საუბრები ადამიანებთან, ისტორიები და საინტერესო თემები ერთი ფინჯანი ყავის გარშემო.
ლალისთან ყავაზე
დაზიანებული ჭერი, კედლები და იატაკი, მოუწესრიგებელი სველი წერტილი და რაც ყველაზე მნიშვნელოვანია, წიგნადი ფონდი, რომელიც დროთა განმავლობაში სულ უფრო ზიანდება, ასეთია დღეს ქობულეთის მუნიციპალიტეტის საჯარო ბიბლიოთეკის მდგომარეობა. შენობაში, სადაც არაერთი თაობა გაიზარდა და წლების განმავლობაში მნიშვნელოვანი კულტურულ-საგანმანათლებლო კერა ჩამოყალიბდა, ბიბლიოთეკის სრული რეაბილიტაციის საკითხი დღემდე ვერ გადაწყდა. სხვადასხვა დროს არჩეული მერები, მათ შორის წინასაარჩევნო პერიოდში, შენობის რეაბილიტაციისა და განახლების პირობას არაერთხელ დებდნენ, თუმცა დაპირება დღემდე არ შესრულებულა. ბიბლიოთეკის მიმდებარე ტერიტორია ახლახან სრულად რეაბილიტირდა. ლესელიძის ქუჩაზე განახლებული სკვერის ფონზე მოძველებული შენობა კიდევ უფრო თვალსაჩინოდ გამოიყურება. 1975 წელს დაარსებულ ქობულეთის საჯარო ბიბლიოთეკაში 35 346-ზე მეტი ქართული და უცხოური ლიტერატურის გამოცემა ინახება. შენობაში ასევე ფუნქციონირებს სხვადასხვა სახელოვნებო წრე, რომელშიც ყოველდღიურად არაერთი მოზარდია ჩართული და კულტურულ-საგანმანათლებლო აქტივობებს ესწრება. ბიბლიოთეკის შენობის რეაბილიტაციისა და წიგნადი ფონდის განახლების მოთხოვნით ქობულეთის მოსახლეობამ წლების წინ თვითმმართველობას პეტიციითაც მიმართა. მას დაახლოებით 700 ადამიანი აწერდა ხელს. მას შემდეგ წლები გავიდა, თუმცა შენობის მდგომარეობა არსებითად არ შეცვლილა და კვლავ გაურკვეველია, როდის დაიწყება მისი განახლების პროცესი. რას აპირებს ქობულეთის მერია საჯარო ბიბლიოთეკის განახლებისა და რეაბილიტაციის მიმართულებით? რატომ ვერ მოხერხდა აღნიშნული საკითხის აქამდე გადაწყვეტა, მით უფრო, რომ მუნიციპალიტეტის ბიუჯეტი ყოველწლიურად იზრდება და 2026 წლისთვის, საბოლოო ცვლილებების გათვალისწინებით, დაახლოებით 110 მილიონ 683 ათას ლარს შეადგენს? მიუხედავად მუნიციპალიტეტის მზარდი ფინანსური რესურსისა, საჯარო ბიბლიოთეკის ახალი პროექტის მომზადებისა და განხორციელებისთვის საჭირო თანხა ბიუჯეტში დღემდე არ გამოიძებნა. როდის დაიწყება ქობულეთის საჯარო ბიბლიოთეკის რეაბილიტაცია და რა ბედი ელის ათწლეულების განმავლობაში შენახულ წიგნად ფონდს, ეს კითხვები კვლავ პასუხგაუცემელია. იმ შემთხვევაში, თუ საკითხზე ქობულეთის მერიისგან განმარტებას მივიღებთ, მასალა განახლდება.
ბიბლიოთეკა, რომელიც წლებია ახალ სიცოცხლეს ელოდება
„ვინც ეძებს, ის პოულობს“ - ამ ოპტიმისტური განწყობით გადიან ისინი ყოველდღე ზღვის სანაპიროზე. ხელში მეტალოდეტექტორებით, თვალით ქვიშისკენ და იმედით, რომ მორიგი გასეირნება საინტერესო აღმოჩენით დასრულდება. ქობულეთის ზღვისპირა სანაპიროზე, განსაკუთრებით შემოდგომის სეზონზე, ოქროსა და სხვა ძვირფასი ლითონების მაძიებლების ნახვა ჩვეულებრივი ამბავია. ისინი საათობით მიუყვებიან პლაჟს და მეტალოდეტექტორით ქვიშას ამოწმებენ. ზღვის ტალღებს ნაპირზე ხშირად სხვადასხვა ნივთი გამოაქვს, მათ შორის სამკაულები, მონეტები და სხვა ლითონის ნივთები, რომლებიც დამსვენებლებს ზაფხულის განმავლობაში ეკარგებათ. თუ გაუმართლათ, სახლში საინტერესო აღმოჩენით ბრუნდებიან. თუ არა, კიდევ ერთი დღე უშედეგო ძებნაში გადის. ჩვენი რესპონდენტი ქობულეთის სანაპიროზე ძვირფას ლითონებს დაახლოებით ხუთი წელია ეძებს. ამბობს, რომ ყველაზე მეტად ოქროს პოვნა აინტერესებს, თუმცა დღევანდელი ძებნა მისთვის უშედეგო აღმოჩნდა. ოქროს მაძიებლის თქმით, კარგი სეზონი სწორედ ზაფხულია, როცა სანაპიროზე ბევრი ტურისტია. რაც უფრო მეტი ადამიანია პლაჟზე, მით უფრო იზრდება დაკარგული ნივთების რაოდენობაც. შემოდგომაზე კი, როცა ზღვა ძლიერდება და სანაპიროზე შტორმული ამინდებია, მაძიებლებისთვის ახალი შესაძლებლობები ჩნდება. მათივე გამოცდილებით, სწორედ შტორმის შემდეგ არის პლაჟზე ძვირფასი ნივთის პოვნის მეტი შანსი. ერთი ნივთის პოვნას ზოგჯერ მთელი დღე სჭირდება. მაძიებლები საათობით დადიან ერთი და იმავე მონაკვეთში, მეტალოდეტექტორის სიგნალს ამოწმებენ, ქვიშას თხრიან და შემდეგ გზას ისევ აგრძელებენ. ყველა სიგნალი ოქრო არ არის. ხშირად აღმოჩენილი ნივთი უბრალოდ ლითონის ნაგავია, ძველი მონეტა ან სხვა მცირე ზომის ნივთია. თუმცა ყოველი ახალი სიგნალი იმედს აჩენს, რომ ამჯერად შეიძლება ძვირფასი რამ აღმოჩნდეს. ქობულეთის სანაპიროზე ოქროს ადგილობრივებთან ერთად უცხოელებიც ეძებენ. მაძიებლების თქმით, ბოლო პერიოდში კონკურენციაც გაიზარდა, შესაბამისად, სასურველი ნივთის პოვნის შანსიც შემცირდა.
ოქროს მაძიებელი ქობულეთიდან
ბათუმში, თამარის დასახლებაში, მოსახლეობა ავტომობილების სახიფათო და ხმაურიანი მართვის გახშირებულ შემთხვევებზე საუბრობს. მოქალაქის ინფორმაციით, ტერიტორიაზე, დღე-ღამის სხვადასხვა მონაკვეთში, მძღოლების ნაწილი სახიფათო მანევრებს ასრულებს. მისივე თქმით, შემთხვევებს თან ახლავს ძლიერი ხმაური, გამონაბოლქვი და დამწვარი საბურავების მძაფრი სუნი. მოქალაქის თქმით, მოსახლეობამ შესაბამის უწყებებს არაერთხელ მიმართა და ტერიტორიაზე ვიდეოსამეთვალყურეო კამერების განთავსება მოითხოვა. „ეს ტერიტორია ავტოდრომი არ არის და დაუშვებელია მისი გამოყენება ისეთი აქტივობებისთვის, რომლებიც საფრთხეს უქმნის მოქალაქეთა უსაფრთხოებას. რამდენ ხანს უნდა გაგრძელდეს ეს მდგომარეობა? რატომ უნდა დაველოდოთ უბედურ შემთხვევას?“ - მოგვწერა მოქალაქემ.
სახიფათო მანევრირება
გამოიწერე