საქართველოს საკონსტიტუციო სასამართლოს პირველმა კოლეგიამ 5 ოპოზიციური პოლიტიკური პარტიის საქმიანობის კონსტიტუციურობისა და მათი აკრძალვის საკითხზე პარლამენტის 88 წევრის მიერ შეტანილი კონსტიტუციური სარჩელი განსახილველად სასამართლოს პლენუმს გადასცა.
საქმე ეხება პოლიტიკური პარტიების „ერთიანობა – ნაციონალური მოძრაობის“, „კოალიცია ცვლილებისთვის გვარამია მელია გირჩი დროას“, „ძლიერი საქართველო – ლელო, ხალხისთვის, თავისუფლებისთვის!“, „ფედერალისტური პარტიისა“ და „გახარია საქართველოსთვის“ საქმიანობის არაკონსტიტუციურად ცნობასა და აკრძალვას.
სარჩელი სასამართლოში 2026 წლის 24 სექტემბერს საქართველოს პარლამენტის 88 წევრმა შეიტანა. მისი არსებითად განსახილველად მიღების საკითხზე განმწესრიგებელი სხდომა 6 ოქტომბერს, ზეპირი მოსმენის გარეშე გაიმართა.
მოსარჩელეები პარტიების აკრძალვის მოთხოვნას რამდენიმე გარემოებით ასაბუთებენ, მათ შორის, საქართველოს კონსტიტუციური წყობილების დამხობის ან ძალადობით შეცვლის მცდელობებით, ქვეყნის დამოუკიდებლობისა და ტერიტორიული მთლიანობის ხელყოფით და დემოკრატიული წესით არჩეული ხელისუფლების ლეგიტიმურობის უარყოფით.
საკონსტიტუციო სასამართლოს განმარტებით, პოლიტიკური პარტიების შექმნის, საქმიანობისა და აკრძალვის საკითხის კონსტიტუციურობის შეფასება სასამართლოს პრაქტიკაში აქამდე არ განხორციელებულა. კოლეგიამ მიიჩნია, რომ საქმე იშვიათ და განსაკუთრებით მნიშვნელოვან სამართლებრივ საკითხებს შეეხება.
საბოლოო გადაწყვეტილებით, №1979 კონსტიტუციური სარჩელი განსახილველად საკონსტიტუციო სასამართლოს პლენუმს გადაეცა. განჩინება საბოლოოა და გასაჩივრებას ან გადასინჯვას არ ექვემდებარება.
სახალხო დამცველმა აქციების შემზღუდავი კანონმდებლობა საკონსტიტუციო სასამართლოში გაასაჩივრა
საია, „სტუდია მონიტორი“ და „საქართველოს ამბები“ FARA-ს გაუქმებას საკონსტიტუციო სასამართლოში ითხოვენ
