„ძლიერი საქართველო-ლელო“ „ქართული ოცნების“ მიერ ქართველი ემიგრანტებისთვის საარჩევნო უფლების შეზღუდვას საკონსტიტუციო სასამართლოში ასაჩივრებს.
პარტიის განცხადებით, 2025 წელს მიღებული ახალი რეგულაციებით, საზღვარგარეთ მცხოვრებ საქართველოს მოქალაქეებს არჩევნებში მონაწილეობის შესაძლებლობა პრაქტიკულად შეეზღუდათ. პარტიაში ამბობენ, რომ ხელისუფლებამ ემიგრანტებს არჩევნების დღეს საქართველოში დაბრუნებისა და ხმის მიცემის შესაძლებლობა შესთავაზა.
„ძლიერი საქართველო-ლელოს“ შეფასებით, 2024 წლის საპარლამენტო არჩევნებმა აჩვენა, რომ საზღვარგარეთ გახსნილ საარჩევნო უბნებზე, სადაც, პარტიის მტკიცებით, ხელისუფლებას მანიპულირებისა და ზეწოლის შესაძლებლობა ნაკლებად ჰქონდა, „ქართული ოცნება“ დამარცხდა და დაახლოებით 13% მიიღო.
პარტიაში მიიჩნევენ, რომ ახალი რეგულაციები საქართველოს კონსტიტუციას ეწინააღმდეგება და საკონსტიტუციო სასამართლოში მათი გაუქმების მოთხოვნით დავას იწყებენ.
„ძლიერი საქართველო-ლელოს“ განცხადებით, პარტია თვეების განმავლობაში მუშაობდა საკონსტიტუციო სარჩელზე და მზად არის, ქართველ ემიგრანტებს წარმომადგენლობა გაუწიოს და მათი საარჩევნო უფლების დასაცავად სამართლებრივად იბრძოლოს.
