საკონსტიტუციო სასამართლოში ხუთი ოპოზიციური პარტიის აკრძალვის მოთხოვნით „ქართული ოცნების“ მიერ შეტანილი სარჩელის განხილვა გრძელდება. პროცესის მე-14 დღეს მხარეებს შორის დავის ერთ-ერთი მთავარი საკითხი მტკიცებულებების შეფასება, ბრალდებების კონკრეტიკა და პოლიტიკური პარტიების პასუხისმგებლობის საკითხი იყო.
დღევანდელ სხდომაზე მოსამართლეების კითხვებს „ძლიერი საქართველო – ლელოს“ წარმომადგენლები პასუხობდნენ. პარტიის ერთ-ერთმა წარმომადგენელმა, ანა ბუჩუკურმა, პროცესს სამართლებრივი ხასიათი დაუწუნა და განაცხადა, რომ სასამართლოს მიერ განხილული საკითხები მის პარტიას არ მიემართება. მისი თქმით, ხელისუფლების სარჩელი სამართლებრივ საფუძვლებს მოკლებულია და პროცესზე მოპასუხე მხარეს გადაწყვეტილებაზე გავლენის მოხდენის შესაძლებლობა არ აქვს.
„ლელოს“ წარმომადგენელმა გრიგოლ გეგელიამ უარყო ბრალდება, თითქოს პარტია რუსეთის წინააღმდეგ ორმხრივი სავაჭრო სანქციების დაწესებას ითხოვდა. მისი განმარტებით, პარტიის პოზიცია საერთაშორისო სანქციების დაცვა და საქართველოსთვის სანქციების გვერდის ავლის მარშრუტად გამოყენების თავიდან აცილება იყო.
სასამართლო სხდომაზე რამდენიმე საკითხზე მწვავე კამათი გაიმართა. ერთ-ერთი მათგანი „რუსული კანონის“ სახელწოდების გამოყენებას უკავშირდებოდა. მოსამართლე რევაზ ნადარაიამ „ლელოს“ წარმომადგენელ გიორგი სიორიძეს მიუთითა, რომ სასამართლოში კანონები ოფიციალური სახელწოდებებით მოეხსენიებინა. სიორიძემ კი განმარტა, რომ ამავე კანონს მმართველი გუნდის წარმომადგენლები „გამჭვირვალობის ქართულ კანონად“ მოიხსენიებენ და მისთვის „გამჭვირვალობის რუსული კანონის“ დარქმევაც იმავე შეფასების გამოხატულებაა.
მოსამართლეებმა „ლელოს“ წარმომადგენლებს ალეკო ელისაშვილთან დაკავშირებითაც დაუსვეს კითხვები. გიორგი სიორიძემ განაცხადა, რომ ელისაშვილს წარდგენილი ბრალდების კვალიფიკაცია არ შეესაბამება აღწერილ ქმედებას და მას პოლიტპატიმრად მიიჩნევს. პარტიის კიდევ ერთმა წარმომადგენელმა, ლევან სამუშიამ, განმარტა, რომ ელისაშვილის ქმედება პარტიისთვის მიუღებელია და მის მიერ გამოყენებული სიტყვა „თავგანწირვა“ დადებით შეფასებას არ გულისხმობდა.
არჩევნების საკითხზე საუბრისას სიორიძემ განაცხადა, რომ პარტია 2020 და 2024 წლების არჩევნების შედეგებს განსხვავებულად აფასებდა, თუმცა 2021 და 2025 წლების არჩევნების შედეგები აღიარა. მისი თქმით, ოპოზიციისთვის მნიშვნელოვანი იყო პოლიტიკური კრიზისის მშვიდობიანი გზით მოგვარება.
დღევანდელ პროცესზე მტკიცების ტვირთისა და სასამართლოს მიერ გამოსაყენებელი სტანდარტების განსაზღვრის საკითხი წამოჭრა „ნაციონალური მოძრაობის“ წარმომადგენელმა ზაზა ბიბილაშვილმა. მან სასამართლოს შუამდგომლობით მიმართა და მოითხოვა, პლენუმს განემარტა, რა უნდა ამტკიცოს თითოეულმა მხარემ, როგორ ნაწილდება მტკიცების ტვირთი და რა სტანდარტით შეაფასებს სასამართლო წარმოდგენილ მტკიცებულებებს.
შუამდგომლობას არ დაეთანხმა მოსარჩელე მხარე. „ქართული ოცნების“ წარმომადგენელმა არჩილ გორდულაძემ ოპოზიციის პოზიცია გააკრიტიკა და განაცხადა, რომ მოპასუხე მხარე ცდილობს, თავი აარიდოს მის მიმართ დასმულ კითხვებზე პასუხის გაცემას. საბოლოოდ, სასამართლოს პლენუმმა შუამდგომლობა არ დააკმაყოფილა.
სხდომის პარალელურად, მხარეებმა ერთმანეთის მისამართით პოლიტიკური განცხადებებიც გააკეთეს. „ქართული ოცნების“ წარმომადგენელი თორნიკე ჭეიშვილი ამტკიცებდა, რომ ოპოზიციური პარტიების პოზიციებს შორის არსებული განსხვავებები მათ ერთიანობას არ გამორიცხავს. მისი თქმით, პარტიებს წარსულში ერთმანეთისგან გამიჯვნის შესაძლებლობა ჰქონდათ, თუმცა ეს არ გააკეთეს.
მმართველი გუნდის წარმომადგენელმა არჩილ გორდულაძემ კი განაცხადა, რომ ოპოზიციის წარმომადგენლების განცხადებები სასამართლოსა და სამართლებრივი სახელმწიფოს უპატივცემულობაა. თავის მხრივ, „გახარია საქართველოსთვის“ წარმომადგენელმა ბერდია სიჭინავამ ხელისუფლების ლეგიტიმაცია გააკრიტიკა და მას ავტოკრატიული სისტემებისთვის დამახასიათებელი უწოდა.
სარჩელის განხილვა 18 ნოემბერს განახლდება. პროცესის შემდეგ ეტაპზე კითხვებს უკვე მოსარჩელე მხარე დასვამს, ანუ „ქართული ოცნების“ წარმომადგენლები უპასუხებენ მოპასუხე პარტიების შეკითხვებს.
შეგახსენებთ, რომ ხუთი ოპოზიციური პოლიტიკური გაერთიანების აკრძალვის მოთხოვნით საკონსტიტუციო სასამართლოს პარლამენტის 88 დეპუტატმა მიმართა. სარჩელი ეხება პარტიებს: „ერთიანობა – ნაციონალური მოძრაობა“, „კოალიცია ცვლილებისთვის“, „ძლიერი საქართველო – ლელო“, „ფედერალისტური პარტია“ და „გახარია საქართველოსთვის“.
საქმეს საკონსტიტუციო სასამართლოს პლენუმი შვიდი მოსამართლის შემადგენლობით განიხილავს. პროცესი 21 ოქტომბერს დაიწყო და სარჩელს თან ერთვის XI მოწვევის პარლამენტში შექმნილი დროებითი საგამოძიებო კომისიის დასკვნა.

