ღია წყაროებზე დაყრდნობით, 2026 წლის 7 იანვარს აშშ-ის სამხედროებმა ატლანტის ოკეანეში დააკავეს ტანკერი „მარინერა“, რომლის ეკიპაჟშიც სულ 28 მეზღვაური იმყოფება.
საქართველოს საზღვაო ტრანსპორტის სააგენტოს ინფორმაციით, მათ შორის არიან საქართველოს ექვსი მოქალაქე, რომელთაგან ერთ-ერთი, გავრცელებული ცნობით, გემის კაპიტანია. ეკიპაჟში ასევე შედიან უკრაინის 20 და რუსეთის ფედერაციის ორი მოქალაქე.
საზღვაო ტრანსპორტის სააგენტოს განცხადებით, ტანკერის დაკავება უკავშირდება ვენესუელაზე დაწესებული საერთაშორისო სანქციების შესაძლო დარღვევას. უწყებაში აღნიშნავენ, რომ ამ ეტაპზე მიმდინარეობს ფაქტობრივი გარემოებების დაზუსტება, მათ შორის, გემის დამსაქმებელი კომპანიის იდენტიფიცირება და ეკიპაჟის ქართველი წევრების მდგომარეობის შესახებ ინფორმაციის შეგროვება.
ცნობილია, რომ ტანკერი „მარინერა“ რუსეთის დროშის ქვეშ ცურავდა. გემი წარსულში „ბელა 1“-ის სახელით იყო ცნობილი და აშშ-ის სახაზინო დეპარტამენტის სანქცირებულ სიაში ირანული, ვენესუელური და რუსული ნავთობის გადაზიდვის გამო ფიგურირებს.
არსებული ინფორმაციით, ტანკერი „ბელა 1“, რომელიც იმ პერიოდში გაიანას დროშის ქვეშ იმყოფებოდა, ჯერ კიდევ 20 დეკემბერს შევიდა კარიბის ზღვაში. აშშ-ის სანაპირო დაცვამ გემის გაჩერება და დათვალიერება მოითხოვა, თუმცა ეკიპაჟმა მოთხოვნას არ დაემორჩილა და ატლანტის ოკეანის მიმართულებით გააგრძელა სვლა, რის შემდეგაც მას რამდენიმე ამერიკული ხომალდი დაედევნა.
30 დეკემბერს გემმა პანამის დროშა რუსულით შეცვალა და რუსეთის საზღვაო რეესტრში „მარინერას“ სახელით დარეგისტრირდა. ამის შემდეგ, 31 დეკემბერს, რუსეთმა აშშ-ს ოფიციალური ნოტა გაუგზავნა და გემის დევნის შეწყვეტა მოითხოვა. პარალელურად, ტანკერის მიმართულებით რამდენიმე რუსული სამხედრო ხომალდი და წყალქვეშა ნავი გაიგზავნა.
მიუხედავად ამისა, 7 იანვარს ამერიკელმა სამხედროებმა ტანკერი მაინც დააკავეს. გავრცელებული ინფორმაციით, „ბელა 1“-ის ბორტზე ვერტმფრენიდან ამერიკული მედესანტეები გადასხდნენ. უცხოური მედიის ცნობით, რუსული სამხედრო გემები ტანკერის სიახლოვეს იმყოფებოდნენ, თუმცა ვითარებაში არ ჩარეულან.
ამასთან, აშშ-ის ხელისუფლების განცხადებით, დაკავებული გემის ეკიპაჟის წევრებს სისხლის სამართლის ბრალდებებს წარუდგენენ.
