ბათუმის საკრებულო 30 ივნისს დაგეგმილ სხდომაზე ალექსანდრე პუშკინის ქუჩის მონაკვეთზე ორმხრივი მოძრაობის აღდგენის საკითხს განიხილავს.
საუბარია პუშკინის ქუჩის მონაკვეთზე, პარმენ ლორიას ქუჩიდან ვაჟა-ფშაველას ქუჩამდე, სადაც ამჟამად ცალმხრივი მოძრაობაა ორგანიზებული. საკრებულოში წარდგენილი პროექტის მიხედვით, აღნიშნულ მონაკვეთზე ორმხრივი მოძრაობა აღდგება.
განმარტებითი ბარათის თანახმად, ცვლილების მიზანი სატრანსპორტო ნაკადების უკეთ გადანაწილება, საგზაო კვანძების განტვირთვა და მძღოლებისთვის დამატებითი ალტერნატიული მარშრუტის შექმნაა.
პროექტს თანხმობა უკვე მისცა შინაგან საქმეთა სამინისტროს საპატრულო პოლიციის დეპარტამენტმა.
თუ საკრებულო ინიციატივას მხარს დაუჭერს, ბათუმის მერია შესაბამის საგზაო ნიშნებს, მონიშვნებსა და სხვა ტექნიკურ საშუალებებს მოაწყობს, რის შემდეგაც პუშკინის ქუჩის აღნიშნულ მონაკვეთზე ორმხრივი მოძრაობა ამოქმედდება.
