ბათუმში, ბაგრატიონის ქუჩის გზაგამყოფ ზოლზე გაკეთებული სკვერი არაადაპტირებულია. შშმ პირები ტერიტორიაზე ეტლით გადაადგილებას დამოუკიდებლად ვერ შეძლებენ. საქმე ისაა, რომ გზიდან ტროტუარზე ასასვლელი ბორდიური ნულოვანი არაა, რაც ერთგვარი ბარიერია.
ეტლით მოსარგებლეები დღეს სკვერში მივიდნენ და ინფრასტრუტურული ხარვეზი ადგილზე დააფიქსირეს. მათი შეფასებით, მერია შეთანხმებას არღვევს, რაც უთანასწორო გარემოს შექმნას ხელს უწყობს. სტანდარტის დარღვევითაა მოწყობილი უსინათლოთა ბილიკიც.
“ნულოვანი დონეების ნაცვლად 3, 5 ან 7 სანტიმეტრიანი შემაღლებებია ასასვლელებთან, რაზეც ფაქტობრივად შეუძლებელია ეტლით დამოუკიდებლად გადაადგილება. ბათუმის მერიასთან წლების წინ შევთანხმდით, რომ ყველა პროექტში გათვალისწინებული იქნებოდა ნულოვანი დონეები თავისი სტანდარტდაცული დახრილობით, მაგრამ ისევ ისე გრძელდება დარღვევები.
ერთია პროექტი, მეორე აღსრულება, მესამე ინსპექტირება და პროექტის შესაბამისობის დადგენა ასევე, აქ რომელ ეტაპზე მოხდა დარღვევა მოქალაქემ სად და რატომ უნდა არკვიოს, როცა ყველანაირი სამსახური არსებობს, რომ ამას აკონტროლებდებს და სამაგალითოდ სჯიდეს,” – აცხადებს თომა კაკაბაძე, ორგანიზაცია “ცვლილებები თანაბარი უფლებებისათვის” ხელმძღვანელი.
შშმ პირების მოთხოვნებს ბათუმის მერია წერილობით პასუხობს, რომელსაც უცვლელად გთავაზობთ:
“კეთილმოწყობის სამმართველოს მიერ შესყიდული ყველა პროექტში გათვალისწინებულია შშმ პირთა საჭიროებებზე ადაპტირებული გარემოს შექმნა, სადაც ახალი გზის მოწყობა ხორციელდება ყველა მისამართზე ხდება შესაბამისი ნორმების გათვალისწინება, ხოლო იმ ქუჩებზე რაც უკვე მოწყობილია ეტაპობრივად ხორციელდება გადასასვლელების ნულოვან ნიშნულზე დაყვანა,” – წერია მერიის მიერ მოწოდებულ კომენტარში.
