ქობულეთის მერია მოქალაქეებს მოსაწვევით იმ კონცერტზე ეპატიჟება, რომელიც ღია ცის ქვეშ გაიმართება. ადგილობრივებს სოლო კონცერტის მოსმენა უსკამო სივრცეში მოუწევთ. უწყებამ მოსაწვევები ბიუჯეტის ფულით დაბეჭდა.
საქმე ისაა, რომ კულტურის სახლის რეაბილიტაცია ტენდერში გამარჯვებულმა კომპანიამ დროულად ვერ დაასრულა, რის გამოც ღონისძიების გამართვა ქუჩაში გადაწყდა. კერძოდ, შენობაში სკამები ამ დრომდე არაა დამონტაჯებული.
ქობულეთის მუნიციპალიტეტის მერის მოადგილემ “აჭარა თაიმსთან” საუბრისას განაცხადა, რომ პირობების შეუსრულებლობის გამო, კომპანია დააჯარიმეს. დავით ვერულიძემ კონკრეტული ვადა ვერ დაასახელა, თუმცა აღნიშნა, რომ შენობის კეთილმოწყობა მალე დასრულდება.
“სამწუხაროდ კომპანიამ ვადები დაარღვია. სამუშაოები ახლა ჯარიმების ფონზე მიმდინარეობს და დასასრულს უახლოვდება. 2 მარტს დაგეგმილი სოლო კონცერტი კი ღია ცის ქვეშ გაიმართება და ამაში პრობლემას ვერ ვხედავ,” – განაცხადა ქობულეთის მერის მოადგილემ, დავით ვერულიძემ.
ინფორმაციისთვის: ქობულეთში, დედის დღისადმი მიძღვნილი “რერო”-ს სოლო კონცერტი 2 მარტს, 18 საათზე გაიმართება.
