ბათუმის მერია ქუჩების რესურსების ხელახალ გადანაწილებას გეგმავს. საგზაო მოძრაობის ორგანიზების სქემებისა და მულტიმოდალური ქუჩების პროექტირების მომსახურების ტენდერი უკვე გამოცხადებულია. მომსახურების სავარაუდო ღირებულება 495 000 ლარს შეადგენს.
პროექტი, რომლის სახელწოდებაა „სრული ქუჩები“, ბათუმის მუნიციპალიტეტის მდგრადი სატრანსპორტო პოლიტიკის ამოცანების შესაბამისად უნდა განხორციელდეს. ტექნიკური დავალების თანახმად, მერია მიზნად ისახავს ქუჩების რესურსები ხელახლა და რაციონალურად გადაანაწილოს.
„პროექტის მიზანია, ბათუმის მუნიციპალიტეტის მდგრადი სატრანსპორტო პოლიტიკის ამოცანების შესაბამისად, საქართველოში მოქმედი სამართლებრივი აქტების დაცვითა და საგზაო მოძრაობის მონაწილეთა ინტერესების გათვალისწინებით, ქუჩების რესურსების ხელახალი გადანაწილება. „სრული ქუჩების“ პრინციპები ორიენტირებულია საგზაო მოძრაობის მონაწილეთა უსაფრთხო, კომფორტული და შეუფერხებელი გადაადგილების უზრუნველყოფაზე. მულტიმოდალური ქუჩის პრინციპი გულისხმობს საჯარო სივრცის თანასწორ განაწილებას საგზაო მოძრაობის მონაწილეთა შორის. აღნიშნული პრინციპი საგზაო მოძრაობის მონაწილეებს სთავაზობს სხვადასხვა სახის გადაადგილების საშუალებას: საქვეითე, ველოსიპედის, არამოტორიზებული ტრანსპორტის, საზოგადოებრივი ტრანსპორტისა და კერძო ავტომობილის გადაადგილება. ასეთი პრინციპის გამოყენება ქალაქებს ეხმარება ქუჩების უფრო ეფექტიან დაგეგმვაში, რაც ასევე, უზრუნველყოფს ქუჩის მულტიმოდალური გამტარიანობის ზრდას“, – ნათქვამია დოკუმენტში.
პროექტის ფარგლებში შეისწავლიან ქალაქის ქუჩების არსებულ მდგომარეობას, სატრანსპორტო ნაკადებს, ტროტუარებს, გადასასვლელებსა და პარკირების ადგილებს. ასევე, აღირიცხება მსუბუქი ავტომობილების, ავტობუსებისა და სატვირთო მანქანების მოძრაობა. მონაცემები პიკის საათებში 15-წუთიანი ინტერვალებით შეგროვდება. ცალკე აღირიცხება ქვეითებიც, რათა განისაზღვროს, სად არის საჭირო უსაფრთხო გადასასვლელებისა და ტროტუარების მოწყობა, ან გაუმჯობესება.
ტექნიკური დავალების ერთ-ერთი მნიშვნელოვანი ნაწილია დაახლოებით 100 გზაჯვარედინისა და სატრანსპორტო კვანძის კომპიუტერული მოდელირება, რომელიც ჩატარდება პიკის საათში: დილის 09:00-დან 10:00 საათამდე და საღამოს 18:00-დან 19:00 საათამდე. შეფასდება მგზავრობის დრო, ავტომობილების მოძრაობის სიჩქარე, საცობების სიგრძე, შეფერხებები და გზების დატვირთვა. პარალელურად, პროექტი ითვალისწინებს საზოგადოებრივი ტრანსპორტისთვის სპეციალური ზოლების მოწყობას.
კვლევის შედეგების მიხედვით განისაზღვრება, გზის რომელ ნაწილში უნდა მოეწყოს ავტობუსის სამოძრაო ზოლი. გათვალისწინებული იქნება სხვადასხვა სიგრძის ავტობუსების მოძრაობისა და უსაფრთხოდ მანევრირების შესაძლებლობა. მნიშვნელოვანი აქცენტი კეთდება ავტობუსების გაჩერებების ადგილებზე, დიზაინზე. დოკუმენტში აღნიშნულია, რომ გარემოების მიხედვით, საჭიროა ავტობუსებისათვის გასაჩერებელი „კონცხების“ შექმნა და პროექტირება ტროტუარის კონტურის გათვალისწინებით.
რაც შეეხება ველობილიკებსა და ველოსიპედის მოძრაობისთვის განკუთვნილ ზოლებს, პროექტი ითვალისწინებს მათ მოწყობასა და ერთმანეთთან დაკავშირებას, ასევე, გზაჯვარედინებზე უსაფრთხო გადაადგილების უზრუნველყოფას. ცალკე განიხილება ველობილიკებისა და ავტობუსის გაჩერებების ურთიერთმიმართება, რათა მგზავრების ჩასხდომა-გადმოსვლა ველოსიპედისტებისთვის საფრთხეს არ ქმნიდეს. პროექტის ფარგლებში შეიძლება შეიცვალოს ქუჩებზე არსებული სამოძრაო ზოლების განაწილებაც.
„მოძრაობის ორგანიზების სქემაში გასათვალისწინებელია გადაწყვეტების ასახვა კონკრეტულ ფუნქციებთან სამანქანო მისადგომებისთვის: სავაჭრო ობიექტების მომარაგება (დისტრიბუცია), მუნიციპალური დასუფთავების სერვისი, საინკასაციო მომსახურება და ნარჩენების ურნები“, – წერია პროექტში.
განსაკუთრებული ყურადღება დაეთმობა ქვეითთა უსაფრთხოებასა და გადაადგილების პირობებს. პროექტის მიხედვით, უნდა გაუმჯობესდეს ტროტუარები, მოეწყოს გადასასვლელები, პანდუსები და უსაფრთხოების კუნძულები. შესაძლებლობის ფარგლებში, ტროტუარებზე გათვალისწინებული უნდა იყოს მინიმუმ 1,5 მეტრი სიგანის თავისუფალი სივრცე, სადაც გადაადგილებას დაბრკოლებები არ შეაფერხებს. ამასთან, უნდა მოწესრიგდეს პარკირება, განსაკუთრებული ყურადღება დაეთმობა შშმ პირებისა და შეზღუდული მობილობის მქონე ადამიანებისთვის ქუჩების ხელმისაწვდომობას.
სამუშაოების შედეგად მომზადდება ქუჩების მოძრაობის ორგანიზების დეტალური პროექტები, რომლებშიც მითითებული იქნება სამოძრაო ზოლები, საგზაო ნიშნები და მონიშვნები, შუქნიშნები, პარკირების ადგილები, ველობილიკები, ტროტუარები და გაჩერებები.
მიმწოდებელმა, შესრულებულ დავალებასთან ერთად, უნდა წარმოადგინოს მერიის გამწვანებისა და ლანდშაფტური დაგეგმარების სამსახურის დადებითი დასკვნა გამწვანების ელემენტების განთავსების შესახებ, ასევე შპს „სანდასუფთავებისა“ და ა(ა)იპ საქალაქო ინფრასტრუქტურისა და კეთილმოწყობის სამმართველოს წერილები საყოფაცხოვრებო ნარჩენების კონტეინერებისა და განათების ბოძების განთავსების ლოკაციების შეთანხმების თაობაზე.
ბათუმის მერიამ დღემდე ვერ უზრუნველყო მუნიციპალური ტრანსპორტის Google Maps-ზე ასახვა
