AJARATIMES.GE-ის ინფორმაციით, ბათუმის “დინამოს” პრეზიდენტის შვილი ცეცხლსასროლი იარაღის ტარებისა და პოლიციელებისთვის წინააღმდეგობის გაწევის ბრალდებით დააკავეს. ფაქტი შინაგან საქმეთა სამინისტროში დაგვიდასტურეს, სადაც გვითხრეს, რომ გამოძიება სსკ 236-ე მუხლით მიმდინარეობს.
გურამ ბერიძე ბათუმში, სასტუმრო „ლე მერიდიანის“ მიმდებარე ტერიტორიაზე დააკავეს, სადაც ე.წ. “ქუჩური გარჩევა” გაიმართა. გურამ ბერიძეს ორ თვიანი წინასწარი პატიმრობა უკვე შეუფარდეს.
საქმე, ბათუმის “დინამოს” პრეზიდენტის, არჩილ ბერიძის კუთვნილი კომპანიის საქმიანობას ეხება. ორი ერთმანეთისგან დამოუკიდებელი წყარო „აჭარა თაიმსს“ უყვება, რომ მხარეებს შორის კონფლიქტი კომპანიის წილებს უკავშირდება. უფრო კონკრეტულად, ბერიძეს წილის დათმობასა და დიდ თანხას სთხოვენ.
კომპანიის საკონტაქტო ტელეფონზე, დირექტორმა, ქეთევან ბერიძემ გვიპასუხა, რომელმაც „აჭარა თაიმსის“ კითხვებს არ უპასუხა, მან ასევე, არც არჩილ ბერიძესთან დაგვაკავშირა.
ბათუმის “დინამოს” პრეზიდენტი, არჩილ ბერიძე შპს. „Lamini-G“-ის მფლობელია. ბერიძე ასევე, „ქართული ოცნების“ შემწირველია. მან მმართველ პარტიას 20 000 ლარი შესწირა.
