შინაგან საქმეთა სამინისტროს ინფორმაციით, აჭარის პოლიციის დეპარტამენტის თანამშრომლებმა ბათუმში, განზრახ მკვლელობის მცდელობის ბრალდებით, 1995 წელს დაბადებული გ.ტ. ცხელ კვალზე დააკავეს.
უწყების ცნობით, გამოძიებით დადგინდა, რომ ინციდენტი ყოფით ნიადაგზე დაწყებული ურთიერთშელაპარაკების დროს მოხდა. ბრალდებულმა მეზობლად მცხოვრებ კაცს – 1988 წელს დაბადებულ ა.თ.-ს – დანის გამოყენებით სხეულზე ჭრილობები მიაყენა. დაშავებული კაცი სამედიცინო დაწესებულებაში გადაიყვანეს, სადაც შესაბამისი დახმარება გაეწია.
სამართალდამცველებმა დანაშაულის ჩადენის იარაღი დანა ნივთმტკიცებად ამოიღეს.
განზრახ მკვლელობის მცდელობის ფაქტზე გამოძიება საქართველოს სისხლის სამართლის კოდექსის 19-108-ე მუხლით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.
