ბათუმში განსაკუთრებით დიდი ოდენობით ნარკოტიკული საშუალებისა და ფსიქოტროპული ნივთიერების უკანონო შეძენა-შენახვისა და რეალიზაციის ხელშეწყობის ბრალდებით აზერბაიჯანის რესპუბლიკის მოქალაქე დააკავეს. შინაგან საქმეთა სამინისტროს ინფორმაციით, დაკავებულია 1993 წელს დაბადებული ე.ა.
უწყების ცნობით, პოლიციამ ბრალდებულის პირადი დროებითი საცხოვრებელი სახლის ჩხრეკის შედეგად სარეალიზაციოდ გამზადებული განსაკუთრებით დიდი ოდენობით სხვადასხვა სახის ნარკოტიკული საშუალება და ფსიქოტროპული ნივთიერება ამოიღო. მათ შორისაა კოკაინი, მეთადონი, პრეგაბალინი, ექსტაზი და გამომშრალი მარიხუანა.
პოლიციის ინფორმაციით, ნივთმტკიცებად ასევე ამოღებულია ნარკოტიკული საშუალებების დაფასოებისთვის საჭირო მასალები. გამოძიება მიმდინარეობს საქართველოს სისხლის სამართლის კოდექსის 260-ე, 261-ე და 260-ე კვარტა მუხლებით, რაც სასჯელის სახით 20 წლამდე ან უვადო თავისუფლების აღკვეთას ითვალისწინებს.
