დეპუტატი და ბიზნესმენი გიორგი ჭყონია შპს „გზას“ ასხვისებს

11 ივნისს საჯარო რეესტრის ეროვნულმა სააგენტომ მიიღო განცხადება შპს „გზის“ რეგისტრირებულ მონაცემებში ცვლილების შეტანის შესახებ.

განმცხადებელია შპს „ჯი აიკაპიტალის“ წარმომადგენელი ლია ჭყონია, რომელიც, იმავდროულად, „გზის“ სამეთვალყურეო საბჭოს წევრია. აღნიშნული კომპანიის 100%-იან წილს ბიზნესმენი და პარლამენტარი გიორგი ჭყონია ფლობს.

აღნიშნული პირისა და მისი ბიზნესინტერესების შესახებ „საერთაშორისო გამჭვირვალობა საქართველომ“ კვლევა არაერთხელ გამოაქვეყნა. რამდენიმე დღის წინ ორგანიზაციამ გაასაჯაროვა კიდევ ერთი საინტერესო ინფორმაცია, რომელშიც, სხვა კომპანიების პარალელურად, საუბარია ჭყონიას კუთვნილ შპს „გზის“ შესახებაც. კერძოდ, კვლევის თანახმად, ტენდერები მორგებულია დეპუტატის ინტერესებზე. ის კი, კომპანიის სხვა წარმომადგენლებთან ერთად, „ქართულ ოცნებას“ ასეულობით ათას ლარს სწირავს.

„გამჭვირვალობის“ კვლევა 2026 წლის 11 ივნისს გამოქვეყნდა. ჭყონიამ შპს „ჯი აი კაპიტალის“ სასარგებლოდ წილის გასხვისება სწორედ იმავე დღეს გადაწყვიტა

განმცხადებელმა მიუთითა, რომ აღნიშნული სერვისის მიღება ერთ დღეში სურდა. თუმცა საჯარო რეესტრმა სარეგისტრაციო წარმოება შეაჩერა. დოკუმენტში წერია, რომ გიორგი ჭყონიას საკუთრებაში არსებულ 100% წილზე რეგისტრირებულია გირავნობა სს „ბანკი ქართუს“ სასარგებლოდ. ამდენად, გირავნობის ხელშეკრულების თანახმად, მესაკუთრე/დამგირავებელი ვალდებულია, არ გაასხვისოს და არ დააგირავოს წილი გირავნობის უფლების შეწყვეტამდე. შესაბამისად, რეესტრმა ჭყონიას წილის გასხვისებაზე „ბანკი ქართუს“ თანხმობა მოსთხოვა.

საჯარო რეესტრიდან ბოლო ამონაწერი, რომელიც 2026 წლის 7 მაისით თარიღდება, გვამცნობს, რომ შპს „გზის“ 100% წილი კვლავ გიორგი ჭყონიას ეკუთვნის, ხოლო წილის მმართველი ჯიმშერ ზოიძეა. ეს ნიშნავს, რომ არსებული მდგომარეობით (2026 წლის 17 ივნისი) კომპანიის რეგისტრირებული მონაცემები არ შეცვლილა.

შეგახსენებთ, რომ გიორგი ჭყონია 2024 წლიდან საქართველოს მე-11 მოწვევის პარლამენტის წევრია, საარჩევნო სუბიექტი: “ქართული ოცნება – დემოკრატიული საქართველო“, საარჩევნო ფორმა: დელეგატი.