აჭარის უმაღლესი საარჩევნო კომისიის თავმჯდომარეობა პარმენ ჯალაღონიას აღარ სურს, ამის შესახებ ცნობილი მას შემდეგ გახდა, რაც აჭარის უმაღლესი საბჭოს ვებგვერდზე კანდიდატთა განაცხადები გამოქვეყნდა. წარმოდგენილ სიაში მოქმედი თავმჯდომარის სახელი აღარ ფიგურირებს.
„10 წელია, უმაღლესი საარჩევნო კომისიის თავმჯდომარე ვარ და მოცემულ ვითარებაში, რისი გაკეთებაც შესაძლებელი იყო, გავაკეთე. ორგანიზაციაშიც და პროფესიულ საქმიანობაშიც ცვლილებების დროა. მქონდა რამდენიმე შემოთავაზება და ამ არჩევანის წინაშე ვიდექი, თუმცა უსკოს თავმჯდომარეობის გაგრძელებას აღარ ვაპირებდი, რადგან ეს თანამდებობა მემკვიდრეობით არა,“ – განაცხადა პარმენ ჯალაღონიამ ჩვენთან საუბრისას.
უსკოს თავმჯდომარის პოზიციაზე ორი კანდიდატი დარეგისტრირდა – მარიამ გუგუნავა და პაატა კეშელავა.
გამოქვეყნებული ბიოგრაფიული მონაცემების მიხედვით, მარიამ გუგუნავა უსკოს მოქმედი წევრია. პაატა კეშელავა კი ამჟამად აჭარის უმაღლეს საბჭოში მუშაობს, ის საკონსტიტუციო, იურიდიულ და საპროცედურო საკითხთა კომიტეტის აპარატის უფროსის თანამდებობას იკავებს.
ცნობისთვის, პარმენ ჯალაღონია აჭარის უმაღლეს საარჩევნო კომისიაში 2016 წელს შევიდა.
პარმენ ჯალაღონიას მეჯვარეა აჭარის მთავრობის ყოფილი თავმჯდომარე, თორნიკე რიჟვაძე. სავარაუდოდ, სწორედ ეს გარემოება გახდა ერთ-ერთი მიზეზი, რის გამოც ჯალაღონიას უსკოში მესამე ვადით დარჩენის შესაძლებლობა აღარ მიეცა. მას შემდეგ, რაც რიჟვაძემ თანამდებობა დატოვა, მისი გუნდის წევრებად ან მასთან დაკავშირებულ კადრებად მიჩნეულმა არაერთმა პირმა დატოვა დაკავებული პოზიცია.
„აბსოლუტურად მესმის, საითაც მიგყავთ საუბარი, მაგრამ მინდა დაგარწმუნოთ, რომ ჩემი გადაწყვეტილება ნამდვილად არ უკავშირდება ამ საკითხს,“ – განაცხადა პარმენ ჯალაჟონიამ თემის კომენტირებისას.
თორნიკე რიჟვაძე საქართველოში დაბრუნდება და კითხვებს თავად უპასუხებს – დავით რიჟვაძე
