ბათუმის რესპუბლიკური საავადმყოფოს ემერჯენსის განყოფილებას თვეებია კრიტიკულად მნიშვნელოვანი მედიკამენტების დეფიციტი აქვს, ამის შესახებ „აჭარა თაიმსს“ ექიმები პირად საუბრებში უყვებიან.
მათი ინფორმაციით, სამედიცინო დაწესებულებას ამ ეტაპზე არ აქვს ინსულინი, კალიუმის ქლორიდი და სხვა აუცილებელი მედიკამენტები. სამედიცინო პერსონალის შეფასებით, მსგავსი პრეპარატების არქონა რეალურ საფრთხეს ქმნის, რადგან გადაუდებელი საჭიროების შემთხვევაში პაციენტებისთვის შესაბამისი მკურნალობის გაწევა შესაძლოა ვერ მოხერხდეს.
რატომ შეიქმნა მედიკამენტების დეფიციტი ბათუმის რესპუბლიკურ საავადმყოფოში, კითხვით „აჭარა თაიმსმა“ სამედიცინო დაწესებულებას მიმართა. საზოგადოებასთან ურთიერთობის სამსახურში თავდაპირველად განმარტების მოწოდებას დაგვპირდნენ, თუმცა მოგვიანებით განაცხადეს, რომ აღნიშნული ინფორმაცია სიმართლეს არ შეესაბამება.
„აჭარა თაიმსმა“ ინფორმაციის გადასამოწმებლად კლინიკას მედიკამენტების მარაგის დამადასტურებელი მასალის, მათ შორის ფოტოსურათის წარმოდგენა სთხოვა, თუმცა შესაბამისი მტკიცებულება ვერ მივიღეთ.
მოგვიანებით ექიმებმა „აჭარა თაიმსს“ ასევე პირად საუბარში განუცხადეს, რომ მას შემდეგ, რაც ჩვენ საკითხით დავინტერესდით, სამედიცინო დაწესებულებამ გარკვეულ მედიკამენტებზე ხელშეკრულებები გააფორმა და სავარაუდოდ, მათი მიღება უახლოეს პერიოდში მოხდება.
