როდის მოხდება ცეცხლაურში არსებული ნაგავსაყარის ექსპლუატაციაში მიღება დღემდე გაურკვეველია. თავდაპირველი დათქმის თანახმად, პროექტის დასრულება 2018 წლის ზაფხულში იგეგმებოდა.
რატომ არ დასრულდა პროექტი დათქმულ ვადებში – კითხვას ფინანსთა და ეკონომიკის სამინისტრო მეტწილად არ პასუხობდა, ცალკეულ შემთხვევებში კი სხვადასხვა მიზეზი სახელდებოდა. ბოლოს მინისტრმა, ჯაბა ფუტკარაძემ მედიასთან საუბრისას განაცხადა, რომ ნაგავსაყარის ექსპლუატაციაში მიღება 2023 წელს მოხდებოდა.
აჭარის უმაღლესი საბჭოს საფინანსო-საბიუჯეტო და ეკონომიკურ საკითხთა კომიტეტის წევრი გვარწმუნებს, რომ პროექტის ექსპლუატაციაში მიღება მალე მოხდება, თუმცა ტიტე აროშიძე თარიღის დაზუსტებისგან თავს იკავებს. დეპუტატმა “აჭარა თაიმსთან” საუბრისას განაცხადა, რომ ამ ეტაპზე რამდენიმე ტენდერია გამოცხადებული, რაც საჭირო მოწყობილობების შესყიდვას გულისხმობს.
“2024 წლის მეორე ნახევრისთვის ნაგავსაყრელის ექსპლუატაციაში მიღება მოხდება. გარკვეული ტენდერები უკვე გამოცხადებულია, შესაძენია დამატებით მოწყობილობები, რაც ნაგავსაყრელის ოპერირებისთვის არის აუცილებელი. დამატებითი სამუშაოებია შესასრულებელი, რაც დროს მოითხოვს. არსებობს ობიექტური მიზეზები, რის გამოც პროექტის ექსპლუატაციაში მიღება შეფერხდა,” – განაცხადა ჩვენთან საუბრისას ტიტე აროშიძემ.
ინფორმაციისთვის: პროექტს, აჭარის ფინანსთა და ეკონომიკის სამინსიტრო EBRD-ის ხელშეწყობით ახორციელებს. ბიუჯეტი 7 მილიონი ევროა. აღჭურვილობისთვის კი, დამატებით 25 მილიონი ევრო დაიხარჯება. პროექტი ითვალისწინებს: ახალი სანიტარული ნაგავსაყარის მშენებლობას ცეცხლაურში, ასევე, ბათუმისა და ქობულეთის ორი არასტანდარტული მოქმედი ნაგავსაყარის ეტაპობრივ დახურვას.
დღემდე ნარჩენები ადლიის პოლიგონზე იყრება. არაოფიციალური ნაგავსაყარი 1965 წლიდან ფუნქციონირებს.
