“სოლიდარობა რეჟიმის პატიმრებს” – პედაგოგების აქცია ბათუმში

“გამოვუცხადეთ სოლიდარობა ჩვენს ახალგაზრდებს, რომლებიც ორი კვირაა რუსთაველზე არიან. არცერთი უფლებამოსილი პირი არ გამოვიდა და არ მოუსმინა მათ, გაიაზრონ რა გვინდა! არ გვინდა არჩევნების წართმევის შედეგად მოსული მთავრობა, არც მათ მიერ ერთპიროვნულად მიღებული გადაწყვეტილება, რომ ვწყვეტთ ყოველგვარ მუშაობას ევროკავშირთან. კიდევ ერთხელ ვაცხადებთ, ჩვენი გზა არის ევროპისაკენ. ამ დასისხლიანებულ ადამიანებს დღევანდელ ე.წ მთავრობას არავინ აპატიებს! საერთოდ გადაუსვეს ხელი განათლების აუცილებლობას ჩვენს ქვეყანაში, არადა, განათლების გარეშე ვართ იქ, სადაც ვართ. მეამაყება ის ბავშვები, რომლებიც ღამეები დგანან ბათუმში, თბილისში – ისინი ჩვენი მოსწავლეები არიან. მე არ ვიცი ვისი გაზრდილია კობახიძე და ყაველაშვილი… რა უფლებით და კომპეტენციის საფუძველზე იღებს ეს ადამიანი თავის თავზე პასუხისმგებლობას გახდეს ამ ქვეყნის პრეზიდენტი. შეთავაზება შეიძლება იყოს, მაგრამ ადამიანს უნდა გქონდეს, განცდა რა შეგიძლია, რისი უფლება გაქვს პირადად. მათ შორის ყაველაშვილს მოვუწოდებ, ოფიციალურად უარი განაცხადოს იმ სამარცხვინო წარდგენაზე, რაც მოუწყო დღევანდელმა ე.წ მთავრობამ”, – აცხადებს პედაგოგი ინგა ბაგრატიონი ჩვენთან საუბრისას.

საპროტესტო აქციას შეუერთდა პედაგოგი სულხან ოქროპირიძეც, რომელიც “ქართული ოცნებისა” და ქობულეთის საკრებულოს ყოფილი თავმჯდომარეა. მისი შეფასებით, ყოფილი თანაგუნდელების ქმედებები ანტი ევროპულია.

“ამას ლოგიკური ახსნა არ აქვს თუ რა ვითარებაში ვართ. ცალსახად ვხედავთ, რომ ხელისუფლების გადაწყვეტილება არის აშკარად ანტი ევროპული, რაც რუსულ წისქვილზე ასხამს წყალს. ეს ყველაზე დიდი პრობლემაა, იმიტომ, რომ ორი საუკუნეა ჩვენი წინაპრები იბრძვიან ამ სივრცისგან გამოსაყოფად და დამოუკიდებლობისთვის. ჩვენი ქვეყანა არის ძალიან დიდი საფრთხის წინაშე. ვდგებით იმ საფრთხის წინაშე, რომ ყველა, ცივილიზებული სამყარო ყოველდღიურად წყვეტს საქართველოსთან ურთიერთობას. ჩემი აზრით, ეს ყველაფერი საბოლოო ჯამში მიგვიყვანს ბელარუსიზაციასთან და ჩვენ აღმოვჩნდებით იზოლირებული,” – თქვა ჩვენთან საუბრისას “ქართული ოცნებისა” და ქობულეთის საკრებულოს ყოფილმა თავმჯდომარემ სულხან ოქროპირიძემ.