ქობულეთის ცენტრალურ პარკში უნებართვო მშენებლობის შესახებ ინფორმაცია რამდენიმე დღის წინ მივიღეთ. მასალაზე მუშაობის შემდეგ გავარკვიეთ, რომ მერიამ სამსართულიანი ნაგებობის დემონტაჟის ნებართვა დაუყონლებლივ გასცა.
ობიექტის დემონტაჟი გუშინ, 25 ივლისს, ღამის პირველი საათის შემდეგ დაიწყეს. ტერიტორია მერიის ზედამხედველობის სამსახურის თანამშრომლებმა შემოსაზღვრეს და თავდაპირველად სახლზე მისასვლელი კიბე მოშალეს.
» ადგილზე საინფორმაციო ბანერი არაა განთავსებული, შესაბამისად ჩვენთვის უცნობია დარჩა რა ტიპის ობიექტი შენდებოდა. კომპანიას ვებგვერდი არ გააჩნია, მათ შორის ინფორმაცია არც საჯარო რეეესტრის დოკუმენტებშია მითითებული.
დღეს დილით, 26 ივლისს, დაახლოებით 12 საათისთვის კი, ტერიტორიაზე მძიმე ტექნიკა არ მუშაობდა, ადგილზე ზედამხედველობის სამსახურის უფროსი, გიორგი ბეჟანიძე დაგხვდა. რატომ ვერ შეამჩნია ზედამხედველობის სამსახურმა უნებართვო მშენებლობა ცენტრალურ პარკში და რის საფუძველზე გაიცა დემონტაჟის ბრძანება სამი სართული აშენების შემდეგ? კითხვებზე ბეჟანიძემ არ გვიპასუხა და თანამშრომლისკენ გადაგვამისამართა.
ანალოგიური კითხვებით მერიის ზედამედველობის სამსახურის, სამშენებლო საქმიანობის ზედამხედველობის განყოფილების უფროსს მივმართეთ, თუმცა ბესიკ ბაქანიძემ არ გვიპასუხა. ამ უკანასკნელმა მხოლოდ ის გვითხრა, რომ შპს „გრინ პარკი ქობულეთი“ უნებართვო მშენებლობის გამო, 20 000 ₾არით დააჯარიმეს და შენობას ანგრევენ.
როგორ ვერ შეამჩნია უნებართვო მშენებლობა ქობულეთის მერიამ ცენტრალურ პარკში, თვალსაჩინო ადგილზე და რატომ გაიცა დემონტაჟის ბრძანება მშენებლობის დასრულების შემდეგ? კითხვები მერმა ლევან ზოიძემ და მისმა მოადგილემ, დავით ვერულიძემ უპასუხოდ დატოვეს.
აღმაშენებლის ქუჩის 287-ში, ცენტრალური პარკში, 320.00 კვადრატული მეტრი ტერიტორია საჯარო რეესტრის მონაცემებით შპს „გრინ პარკი ქობულეთის“ საკუთრებას წარმოადგენს. ამჟამინდელმა მესაკუთრემ, გელა ხინიკაძემ ტერიტორია და მასზე არსებული ძველი ორ სართულიანი შენობა შპს „გამა+“– გან 2023 წლის სექტემბერში შეიძინა.
წყარო ქობულეთის მერიიდან გვიყვება, რომ უკანონო მშენებლობას ვიცე მერი, დავით ვერულიძე და მერი, ლევან ზოიძე მფარველობენ. ტერიტორიისა და შენობის მესაკუთრის, გელა ხინიკაძის შვილი, მამუკა ხინიკაძე ვიცე მერის, დავით ვერულიძის კლასელი, კურსელი და საუკეთესო მეგობარია.
ქობულეთის მერიის საზოგადოებასთან ურთიერთობის სამსახურში გვითხრეს, რომ უკანონო მშენებლობისა და მისი მფარველობის შესახებ დავით ვერულიძე კომენტარს არ გააკეთებს. ამ უკანასკნელმა არც ჩვენს შეტყობინებას უპასუხა.
ინფორმაციისთვის: ქობულეთში უნებართვო მშენებლობები და უკანონობის მფარველობა არახალია. არაერთ დანაშაულზე სახელმწიფო აუდიტის სამსახურიც წერდა. რეაგირება არცერთ მათგანზე მომხდარა.
აქვე დაგაინტერესებთ: ⇓
- ქობულეთის მერიის მიერ უკანონო მშენებლობების აღკვეთის მიზნით გატარებულმა ღონისძიებებმა პროცესის აღკვეთა ვერ უზრუნველყო – აუდიტი
- ქობულეთში კაფეს პლაჟზე ჩასავლელ კიბეზე აშენებენ – უკანონობაზე მერია არ რეაგირებს
- ქობულეთში ქარსაცავი ზოლი სპეციალისტის რეკომენდაციის გარეშე გაჩეხეს
