უკანონო მშენებლობის ფაქტი ქობულეთში. კაფე, ზღვაზე ჩასასვლელ კიბეზე შენდება, შედეგად პლაჟზე გადადგილება შეზღუდულია. ამ ეტაპზე მხოლოდ საძირკვლისა და პირველი სართულის მშენებლობაა დასრულებული.
აღნიშნული შენობის გვერდით არის კიდევ ერთი კაფე, რომელიც უკანონოდაა აშენებული. კანონდარღვევის ფაქტებზე მუნიციპალიტეტის ზედამხედველობის სამსახური მკაცრად არ რეაგირებს. ობიექტი დაჯარიმებისა და გაფრთხილების მიუხედავად, ერთ წელზე მეტია, რაც ფუნქციონირებს.
კაფეში ახლა დალაგების პროცესი მიმდინარეობს და როგორც ადგილზე გვითხრეს ტურისტული სეზონისთვის ემზადებიან. უკანონო მშენებლობები დააფიქსირა სახელმწიფო აუდიტის სამსახურმაც, რომელიც თავის დასკვნაში მერიას აკრიტიკებს.
სახელმწიფო აუდიტის სამსახურის ბოლო დასკვნის თანახმად, მუნიციპალიტეტის მერიის მიერ გაცემული სამშენებლო ნებართვები დანაშაულის ნიშნებს შეიცავს, ასევე, უკანონო მშენებლობებზე სათანადო რეაგირება არ ხდება.
“თამარ მეფის სანაპირო №52-ისა და №54-ის მიმდებარედ, დაფიქსირდა კაფე ბარების უნებართვო მშენებლობები. ორივე შემთხვევაში მშენებლობა განხორციელებულია მუნიციპალიტეტის საკუთრებაში არსებულ მიწის ნაკვეთზე, რომლითაც აღნიშნული პირები სარგებლობდნენ მერიასთან გაფორმებული საიჯარო ხელშერკულების საფუძველზე.
აღნიშნულთან დაკავშირებით 2023 წლის ივლისში მუნიციპალიტეტის ზედამხედველობის სამსახურის მიერ მიღებულია დადგენილებები, მშენებელი პირების დაჯარიმებისა და უკანონოდ აშენებული შენობების დემონტაჟის შესახებ, თუმცა აუდიტორების შესწავლის პროცეში აღმოჩნდა, რომ შენობების დემონტაჟი არ იყო განხორციელებული.
მერიის მიერ უკანონო მშენებლობების აღკვეთის მიზნით გატარებულმა ღონისძიებებმა ვერ უზრუნველყო უნებართვო მშენებლობების შეჩერება და სახელმწიფო საკუთრებაში არსებული მიწის ნაკვეთების უკანონო გამოყენება, რაც ქობულეთის ტერიტორიაზე მშენებლობების ზედამხედველობასთან დაკავშირებული შიდა კონტროლის სისტემის არსებით სისუსტეზე მიუთითებს,” – წერენ აუდიტორები დასკვნაში.
