ქობულეთში, თავისუფლების ქუჩაზე – კერძოდ ბაზრის მიმდებარედ – გუშინ ღამით დაზიანდა წყლის ცენტრალური მილი, რის გამოც მთელ ქალაქს სასმელი წყლის მიწოდება შეუწყდა.
როგორც ადგილობრივები აცხადებენ, ავარიის შესახებ არც გაფრთხილება მიუღიათ და არც რაიმე სახის შეტყობინება გავრცელებულა უწყების მხრიდან.
„ღამის პირველ საათზე მილი გასკდა და რამდენიმე საათის განმავლობაში წყალი მიედინებოდა ცენტრალურ გზაზე. არც ესემესი მოსულა, არც რომელიმე პლატფორმაზე განთავსებულა ინფორმაცია რომ გაგვეგო, სასმელ წყალს მოვიმარაგებდით,“ – აცხადებს ქობულეთის მცხოვრები.
ინფორმაცია განახლდა: ქობულეთის მერიაში განმარტეს, რომ ცენტრალური მილის დაზიანება ბუნებრივი აირის ქსელზე მიმდინარე სამუშაოებმა გამოიწვია. როგორც მერიაში აცხადებენ, პასუხისმგებელი კომპანია დაჯარიმდა. უწყებაში ამბობენ, რომ სასმელი წყლის მიწოდება ეტაპობრივად მიმდინარეობს.
