ხანძრისა და სტიქიის შედეგად დაზარალებულ 197 ოჯახს დაეხმარებიან, ამის შესახებ ინფორმაციას აჭარის ჯანდაცვის სამინისტრო ავრცელებს. მათივე ცნობით, გადაწყვეტილება სამთავრობო კომისიის სხდომაზე მიიღეს.
კომისიის წევრებმა სტიქიისა და ხანძრის შედეგად დაზარალებული 197 ოჯახის დახმარების საკითხი განიხილეს, აქედან 38 ოჯახი ხანძრის, ხოლო 159 ოჯახი სტიქიის შედეგად დაზარალდა.
“სხდომას აჭარის ჯანმრთელობისა და სოციალური დაცვის მინისტრი, ნინო ნიჟარაძე ხელმძღვანელობდა. კომისიის რეკომენდაციით დაზარალებულ ოჯახებს საცხოვრებელი ფართების აღდგენა-გამაგრების და ადგილმონაცვლეობისთვის, სარეზერვო ფონდიდან, ჯამში 1 591 371 ლარი გამოეყოფა. რეკომენდაცია დასამტკიცებლად უახლოეს დღეებში აჭარის მთავრობის თავმჯდომარეს გადაეგზავნება,” – წერია უწყების მიერ გავრცელებულ ინფორმაციაში.
ინფორმაციისთვის: 2023 წელს სტიქიისა და ხანძრის შედეგად დაზარალებული ოჯახების დასახმარებლად გამოიყო 4 676 395 ლარი, ფინანსური დახმარება გაეწია 520 ოჯახს.
