ხელვაჩაურის მუნიციპალიტეტის საბავშვო ბაღების გაერთიანება „ქართული ოცნების“ სამსახურშია.
ხელმძღვანელობამ სკოლამდელი აღზრდის დაწესებულების გამგეებს დღეს, ბავშვების სახლში გაშვება 2 საათით ადრე მოსთხოვა. მიზეზი დღის ბოლოს შემოვლითი გზის მშენებლობის დასრულების პრეზენტაცია, ასევე, ბათუმში „ქართული ოცნების“ წინასაარჩევნო შეკრებაა, რომელზეც საჯარო მოხელეებს დასწრებას აიძულებენ.
ბავშვების სახლში დროზე ადრე გაშვების ფაქტს გაერთიანების დირექტორის მოადგილე „აჭარა თაიმსთან“ საუბრისას ადასტურებს, თუმცა ბადრი ირემაძე გვარწმუნებს რომ გადაწყვეტილება შენობების სარეაბილიტაციო სამუშაოებს უკავშირდება.
ირემაძე საჯარო მოხელეების იძულებას კატეგორიულად გამორიცხავს, მაგრამ აღნიშნავს, რომ მმართველი პარტიის წინასაარჩევნო შეხვედრაზე, სამუშაო დროის ამოწურვის შემდეგ თავად აპირებს წასვლას.
ჩვენ დავუკავშორდით ხელვაჩაურის მერიის შესყიდვების სამსახურის უფროსს, რომელმაც გვითხრა, რომ ამ ეტაპზე მუნიციპალიტეტში მხოლოდ ორი ბაღის მშენებლობა მიმდინარეობს.
ინფორმაციისთვის: ხელვაჩაურის საბავშვო ბაღების გაერთიანების დირექტორი „ქართული ოცნების“ უმაღლესი საბჭოს სიაშია, ის ასევე, საკრებულოს წევრის, რამაზ თავდგირიძის მეუღლეა.
