ხელვაჩაურში, ერთ-ერთ მიკროავტობუსში, მოქალაქესა და მუნიციპალური ინსპექციის კონტროლიორს შორის სიტყვიერი დაპირისპირება მოხდა. ინციდენტის ამსახველი ვიდეო სოციალურ ქსელში გავრცელდა. პირველადი ინფორმაციით, კამათი სავარაუდოდ, უბილეთოდ მგზავრობას უკავშირდებოდა.
ვიდეომასალაში ჩანს, რომ კონტროლიორსა და მოქალაქეს შორის ხმამაღალი სიტყვიერი შეხლა-შემოხლა მიმდინარეობს, თუმცა კონკრეტული გამომწვევი მიზეზი ჩვენთვის უცნობია.
„აჭარა თაიმსმა“ განმარტებისთვის ხელვაჩაურის მერიას მიმართა. უწყების წერილობით პასუხში აღნიშნულია, რომ ინციდენტი ქვითრის მოთხოვნას მოჰყვა.
„ხელვაჩაურის მუნიციპალური ინსპექციის კონტროლიორმა ერთ-ერთ მიკროავტობუსში მგზავრთა ნაკადის გადამოწმებისას მოქალაქეს მოსთხოვა გადახდის ქვითარი, რაზეც აღნიშნულმა მოქალაქემ, რომელიც სავარაუდოდ არაფხიზელ მდგომარეობაში იყო, უარი განუცხადა და კონტროლიორს სიტყვიერი შეურაცხყოფა მიაყენა,“ — წერია ხელვაჩაურის მერიის მიერ მოწოდებულ წერილობით კომენტარში.
მათივე ინფორმაციით, ფაქტთან დაკავშირებით დისციპლინური წარმოება დაიწყო.
„ხელვაჩაურის მუნიციპალური ინსპექციაში დაწყებულია დისციპლინური წარმოება, რათა მოხდეს ფაქტის შესწავლა და შემდგომი რეაგირება,“ – ამბობენ მერიაში.
ეს სამსახური საერთოდ გასაუქმებელია ან შესამცირებელი,რო აეყუდება ეს 5/6 კაცი ერთ გაჩერებაზე და მზეზუმზირას შეეაქცევიან ამისთვის ხელფასს უხდიან,თან უტაქტოები,სხვა არაფრის მაქნისები და როგორც უმრავლესობას თანამდედბობაზე დანიშნულს თავი მამა ღმერთი გონიათ და სამყარო მათი სამფლობელო, მასე არიან ესენიც!!! უნდა იყოს თითო ოროლა კაცი თან ტრანსპორტს კი არ უნდა აყოვნებდნენ არამედ უნდა დაყვებოდნენ ზემოთ ქვემოთ!!!!😡😡😡