საზღვაო აკადემიის რექტორმა, მურთაზ დევაძემ ადამიანური რესურსების მართვის დეპარტამენტის ხელმძღვანელი და კიდევ ერთი პირი დაკავებული თანამდებობიდან გაათავისუფლა, ამის მიზეზი “აჭარა თაიმსის” მიერ გამოქვეყნებული ინფორმაცია გახდა, თუმცა სასწავლო დაწესებულებაში ამტკიცებენ, რომ თანამშრომელებმა თანამდებობა პირადი განცხადების საფუძველზე დატოვეს.
საქმე ადამიანური რესურსების მართვის დეპარტამენტის ხელმძღვანელის საახალწლო მილოცვას ეხება. ადმინისტრაციის თანამშრომელმა სამსახურეობრივი ფოსტით მილოცვა გაავრცელა, ფოტოზე რუსული დროშა ეხატა.
“გვსურს გამოვეხმაუროთ მედიაში გავრცელებულ ინფორმაციას ბათუმის სახელმწიფო საზღვაო აკადემიაში ელექტრონულ წერილებთან დაკავშირებით მომხდარ ფაქტს: ინფორმაცია დასვენების დღეებთან დაკავშირებით, მილოცვასთან ერთად ელექტრონულ ფოსტაზე აკადემიის თანამშრომლებს გაუგზავნა ადამიანური რესურსების მართვის დეპარტამენტმა, რომელსაც ამავე დეპარტამენტის თანამშრომელმა თავისი ინიციატივით თან დაურთო საძიებო სისტემიდან აღებული მისალოცი ბარათი. ფაქტს მოჰყვა დაუყოვნებელი რეაგირება ბათუმის სახელმწიდფო საზღვაო აკადემიის ადმინისტრაციის მხრიდან და მეილები სისტემიდან მალევე წაიშალა. დეპარტამენტის ხელმძღვანელის განცხადებით, შეცდომა თანამშრომლის დაუკვირვებლობით მოხდა. ადამიანური რესურსების მართვის დეპარტამენტის ხელმძღვანელმა და უშუალო შემსრულებელმა პირადი გადაწყვეტილებით განცხადებით მიმართეს აკადემიის ხელმძღვანელობას სამსახურიდან განთავისუფლებასთან დაკავშირებით – აკადემიის ხელმძღვანელობამ მათი თხოვნა დააკმაყოფილა,” – წერია საზღვაო აკადემიის მიერ გავრცელებულ ინფორმაციაში.
საზღვაო აკადემიის რექტორის თქმით, თანამშრომელს შეცდომა მოუვიდა.
“უქმე დღეებთან დაკავშირებით გააგზავნა ეიჩარმა მეილი და თან მიაყოლა გუგლიდან აღებული ფოტო. არ დააკვირდა როგორც ჩანს, ბევრმა შეამჩნია და უთხრეს ეს რა გააკეთეო?! მეილი უკვე გამოიწვია, წაშალა. მეცოდება ახლა თვითონაც, მაგრამ რა ვქნა,” – გვითხრა საზღვაო აკადემიის რექტორმა, მურთაზ დევაძემ.
ინფორმაციისთვის: საზღვაო აკადემია მედიასთან ღია ურთიერთობით არ გამოირჩევა. უმაღლესი სასწავლო დაწესებულება პროევროპულ აქციებს არ უერთდება, მათ შორის ადმინისტრაციას არც “ქართული ოცნების” პოლიციის მიერ დაშავებული და დასახიჩრებული მომიტინგეების ფაქტი დაუგმია.
