ბაზარზე ზედამხედველობის სააგენტომ ლაბორატორიული შემოწმების შედეგად ბავშვებისთვის საფრთხის შემცველი 9 სათამაშოს ნიმუში გამოავლინა.
სააგენტოს ინფორმაციით, ყველა ნიმუში შეიცავს პატარა ნაწილებს, რომლებიც მარტივად სძვრება და შესაძლოა გადაყლაპვის შემთხვევაში ბავშვებში ასფიქსია – სუნთქვის გაძნელება ან გაგუდვა – გამოიწვიოს. აღნიშნული შედეგების საფუძველზე, მავნე სათამაშოები ამოღებულია ან ამოღების პროცესშია ქვეყნის სავაჭრო ობიექტებიდან.
“ლაბორატორიული შემოწმებისას დადგინდა, რომ სათამაშოს სძვრება პატარა ნაწილი, რომელმაც გადაყლაპვის შემთხვევაში შესაძლოა გამოიწვიოს ზედა სასუნთქი გზების რესპირატორული გართულებები,” – წერია სააგენტოს დასკვნაში.
ბაზარზე ზედამხედველობის სააგენტო მოუწოდებს მშობლებს და მოვაჭრეებს, განსაკუთრებული ყურადღება მიაქციონ ბავშვთა პროდუქციის უსაფრთხოების სტანდარტებს. სათამაშოების სრული სია, რომლებიც საფრთხედ მიიჩნევა, სააგენტოს მიერ გამოქვეყნებულ ბმულზეა ხელმისაწვდომი.
