ბათუმის მუნიციპალიტეტი აუქციონის წესით გადასცემს 43 ერთეულ არასასოფლო-სამეურნეო დანიშნულების მიწის ნაკვეთს, თითოეულის ფართობით 1 კვადრატული მეტრი, ელექტრომობილების დამტენი აპარატების განთავსების მიზნით.
საკრებულოს მიერ მიღებული განკარგულების თანახმად, ქონება გადაეცემა სარგებლობის უფლებით, ხოლო საწყისი წლიური სარგებლობის საფასური ჯამურად 16,000 ლარით განისაზღვრა.
საკრებულოს სხდომაზე განმარტეს, რომ მიწის ნაკვეთების შემფასებელმა – „ლევან სამხარაულის სახელობის სასამართლო ექსპერტიზის ეროვნულმა ბიურომ“ – მერიიდან მიღებული დაკვეთის საფუძველზე მოამზადა შესაბამისი დასკვნები. 43 ნაკვეთის ჯამური ღირებულება 225,765 ლარს შეადგენს, ხოლო შეფასების ხარჯი – 8,600 ლარს. სარგებლობის მინიმალური წლიური საფასური ბიუროს მიერ დადგენილი ღირებულების მინიმუმ 5%-ის შესაბამისად განისაზღვრა.
მერია აღნიშნავს, რომ პროექტის განხორციელება დამატებით ფინანსურ რესურსს არ მოითხოვს, თუმცა დადებითად იმოქმედებს ბიუჯეტის შემოსავლების ნაწილზე – აუქციონის გამარჯვებული ყოველწლიურად გადაიხდის არანაკლებ 16,000 ლარს.
