ჟურნალისტურმა გამოძიებამ, რომელიც პლატფორმა „აი ფაქტმა“ საერთაშორისო პარტნიორებთან ერთად მოამზადა (OCCRP, The Reporter, Voice of Democracy, Rappler), აჩვენა, რომ ბათუმში მსხვილ უცხოელ ინვესტორად წარდგენილი თომას შუ სინამდვილეში ტაივანში დაბადებული და საკუთარ ქვეყანაში ძებნილი ნარკოდამნაშავეა.
გამოძიების მიხედვით, თომას შუ, რომლის ნამდვილი სახელი მინგ ჩინ ჰსუა, ტაივანი 2014 წელს დატოვა მას შემდეგ, რაც სასამართლომ მეტამფეტამინის დამზადებისთვის დამნაშავედ ცნო. მოგვიანებით მან ფილიპინებისა და კამბოჯის მოქალაქეობა მიიღო და იდენტობაც შეიცვალა. სამი ქვეყნის სამართალდამცავი უწყებები მას 2016 წელს 364 მილიონი დოლარის ღირებულების ნარკოტიკების გადაზიდვის დაფინანსებაში ეჭვმიტანილად მიიჩნევენ, რაც აზიის ერთ-ერთ ყველაზე მსხვილ ნარკოსინდიკატს – „Sam Gor“-ს უკავშირდება. ოფიციალური ბრალი ამ ეპიზოდზე შუსთვის არ წარდგენილა.
„აი, ფაქტის“ გამოძიება აღწერს, როგორ გამოჩნდა შუ საქართველოში 2021 წელს, როგორც კამბოჯური უძრავი ქონების დეველოპერული ჯგუფის – „Lixin Group“-ის წარმომადგენელი. ამ სტატუსით ის მონაწილეობდა მაღალი დონის ღონისძიებებში, გახდა ბათუმის „დინამოს“ სპონსორი და კლუბის საპატიო პრეზიდენტიც. იმ პერიოდში ქართულ მედიაში იგი პოზიციონირდებოდა როგორც ინვესტორი, რომელიც ბათუმში მილიარდლარიანი პროექტების განხორციელებას გეგმავდა.
გამოძიება ასევე ეხება „Halcyon Towers“-ის პროექტს, რომელიც ბათუმში ყველაზე მაღალი ცათამბჯენის მშენებლობას ითვალისწინებდა. პროექტის დაანონსებიდან ოთხი წლის შემდეგ მშენებლობა არ დაწყებულა, ხოლო არქიტექტურული ვიზუალიზაციები, როგორც ჟურნალისტებმა დაადგინეს, მნიშვნელოვნად ჰგავს მსოფლიოში ცნობილი არქიტექტორის, ზაჰა ჰადიდის მიერ ჩინეთისთვის შექმნილ დიზაინს.
მასალის თანახმად, მოგვიანებით შუმ საქართველოში არსებული აქტივები ეტაპობრივად გადააფორმა ოჯახის წევრებზე და მისი სახელი ქართული კომპანიების დოკუმენტებიდან გაქრა. პარალელურად, „Lixin Group“-მა უარყო მისი კავშირი კომპანიასთან და მას შემდეგ შუს შესახებ ინფორმაცია ჯგუფის ოფიციალური პლატფორმებიდან წაიშალა.
„აი, ფაქტის“ გამოძიება ხაზს უსვამს იმ გარემოებასაც, რომ გაეროს ნარკოტიკებისა და დანაშაულის წინააღმდეგ ბრძოლის ოფისის (UNODC) ანგარიშში აღწერილი „Business Group 2“, რომელიც ტრანსნაციონალურ კრიმინალურ ქსელად არის მოხსენიებული, წყაროების თქმით, სწორედ „Lixin Group“-ს უკავშირდება. ანგარიშში აღნიშნულია, რომ ამ ჯგუფის ინტერესებში საქართველოც, მათ შორის ბათუმიც, მოიაზრება.
„საერთაშორისო გამჭვირვალობა – საქართველოს“ შეფასებით, ეს შემთხვევა აჩვენებს საქართველოში უცხოური კაპიტალის შემოწმებისა და ინსტიტუციური ზედამხედველობის სისუსტეს. ორგანიზაციის წარმომადგენლების თქმით, მსგავსი პროექტები აჩენს კითხვებს, ვინ და რა ინტერესებით დგას „მსხვილი ინვესტორების“ უკან და რამდენად დაცულია ადგილობრივი მოსახლეობისა და ქალაქის განვითარების ინტერესები.
