ბათუმში მცხოვრები არასრულწლოვანი გიორგი (სახელი შეცვლილია), რომელიც მშობლების თანხმობით პროევროპულ აქციებში აქტიურად მონაწილეობს, აცხადებს, რომ სახლში პოლიციელი მივიდა და დედამისი გამოკითხა.
როგორც არასრულწლოვანი “აჭარა თაიმსთან” საუბრისას ამბობს, პოლიციის წარმომადგენელმა დედას ჰკითხა, ცხოვრობდა თუ არა ამ მისამართზე ბავშვი, რომელიც აქციებზე დადიოდა. დედის დადებითი პასუხის შემდეგ, პოლიციელმა თქვა, რომ ამავე ეზოში თითქოს ბავშვი დაიკარგა, რის შემდეგაც, მისივე თქმით, ოჯახი “ფრთხილად უნდა იყოს”.
„პოლიციელი პირბადით იყო, თავი არ წარუდგენია და დედაჩემმა მისი ამოცნობა ვერ შეძლო. უცნაურია, რა საჭირო იყო ასეთი ვიზიტი, მით უმეტეს, როცა ჩემი აქციებზე ყოფნა ჩემი ოჯახის ნებართვით ხდება,“ – ამბობს სკოლის მოსწავლე.
ოჯახისთვის გაურკვეველი დარჩა, რა იყო რეალური მიზეზი პოლიციელის ვიზიტისა და რატომ დასჭირდა არასრულწლოვნის მშობლის გამოკითხვა.
