ბათუმში დამოუკიდებელი და საავტორო კინოს ბათუმის საერთაშორისო ფესტივალი „BIAFF“-ი მეოცედ ტარდება. ფესტივალი 26 სექტემბრამდე გაგრძელდება. საიუბილეო პროგრამა საერთაშორისო და ქართულ კინოს, საკონკურსო და არასაკონკურსო სექციებს, სპეციალურ ჩვენებებსა და პროფესიულ ღონისძიებებს უმასპინძლებს.
საიუბილეო გახსნის ღონისძიება ბათუმის სახელმწიფო დრამატულ თეატრში გაიმართა და მას „ქართული ოცნების“ თანამდებობის პირებიც ესწრებოდნენ. ფესტივალის მნიშვნელობიდან გამომდინარე, ასეთი მხარდაჭერა გასაკვირი არც უნდა იყოს. თუმცა ბოლო რამდენიმე წელია, არა თუ გახსნის ცერემონიაზე სიტყვით გამოსვლა და მერე – მედიასთან მხარდამჭერი კომენტარები, სახელმწიფო უწყებებმა ფესტივალის დაფინანსებაც კი შეწყვიტეს. იმ რთულ პერიოდში „BIAFF“-ის გუნდი ღონისძიებების გამართვას კერძო პირებისა და რამდენიმე საელჩოს მხარდაჭერით ახერხებდა.
„BIAFF“-ს 20 წლის იუბილე აჭარის კულტურის მინისტრმა ელისო ბოლქვაძემ მიულოცა და განაცხადა, რომ ბათუმში მიმდინარე ფესტივალი კინოინდუსტრიის განვითარებისთვის მნიშვნელოვანია.
„ეს იქნება დასაწყისი ფესტივალის მეორე ეტაპისა, ახალი სუნთქვის და ახალი შემართების და ძალიან მალე ჩვენ გვეწვევა ასევე მნიშვნელოვანი მსოფლიო ვარსკვლავები და ბათუმი გახდება ფილმების ინდუსტრიის ერთ-ერთი უმნიშვნელოვანესი ადგილი“, – განაცხადა ელისო ბოლქვაძემ მედიასთან საუბრისას.
საქართველოს კულტურის მინისტრის მოადგილემ მიხეილ კიკნაძემ კი „BIAFF“-ს ქართული კინოინდუსტრიისა და ქართული კულტურისთვის „კარგი პლატფორმა“ უწოდა და ყურადღება ფესტივალის 20-წლიან ისტორიაზე გაამახვილა. ეს შეფასებები განსაკუთრებით საინტერესოა „BIAFF“-ის ბოლო წლების დაფინანსების ისტორიის ფონზე.
სულ რაღაც ხუთიოდე თვის წინ, 2026 წლის აპრილში, ელისო ბოლქვაძეს „BIAFF“-ის შესახებ კითხვა დაუსვა აჭარის უმაღლესი საბჭოს ოპოზიციონერმა დეპუტატმა. მინისტრმა უპასუხა, რომ აღნიშნულ ფესტივალზე სმენია და იცის, რომ ის ბიუჯეტიდან ფინანსდებოდა, მაგრამ გარკვეული ფესტივალების სახელმწიფო ბიუჯეტიდან დაფინანსება ხანგრძლივი ვადით აუცილებელი არაა.
„არის ფესტივალები, რომლებიც უნდა განვითარდეს. სახელმწიფოს არ აქვს იმის აუცილებლობა და ვალდებულება, რომ სულ აფინანსოს ყველა ფესტივალი“, – ასე განმარტა მაშინ მინისტრმა ოფიციალური პოზიცია.
არ ვიცით, საბოლოოდ მოუბრუნდათ, თუ – არა სახელმწიფო უწყებებს „BIAFF“-ზე გული, მაგრამ ფაქტია, რომ წელს, აჭარის კულტურის სამინისტროს გარდა, ფესტივალის მხარდამჭერთა შორის არიან საქართველოს კულტურის სამინისტრო, საქართველოს კინემატოგრაფიის ეროვნული ცენტრი და ბათუმის მერია. წლევანდელ ფესტივალს აქტიურად აშუქებს სახელისუფლებო მედია.
რა შეიცვალა ან როგორ დალაგდა ურთიერთობები „ბიაფსა“ და „ქართულ ოცნებას“ შორის? პასუხის მისაღებად ჩვენი არაერთი, რამდენიმედღიანი მცდელობის მიუხედავად, ფესტივალის ადმინისტრაცია კითხვებს თავს არიდებს.
„მე ვერ დაგიზუსტებთ და ვერ დაგიდასტურებთ, რომ [„ქართულ ოცნებას“,] კრიტიკული განწყობები ჰქონდა ბიაფის მიმართ. არ ვიცი, ვინ შეიძლება გიპასუხოთ ამ საკითხზე. ვიცი, რომ წელს ბიაფი დიდი მასშტაბით წარდგა და ყველა კმაყოფილია“, – განუცხადა „აჭარა თაიმსს“ გოჩა გოგიბერიძემ.
ჩვენ მას ასევე ფესტივალის დაფინანსების ოდენობის შესახებ ვკითხეთ. მისი თქმით, წელს სპონსორების ჩამონათვალი ვრცელია, შესაბამისად, დაფინანსების ზუსტი ოდენობის შესახებ ინფორმაცია არ აქვს.
ცნობისთვის, ფესტივალი 2006 წელს დაარსდა და თავიდანვე ორიენტირებული იყო ინტელექტუალური კინოს ჩვენებაზე. ის საერთაშორისო ყურადღების ცენტრში მალევე მოექცა. ამ წლების განმავლობაში ბათუმს არაერთი ცნობილი ქართველი თუ უცხოელი ხელოვანი ესტუმრა. ეს ძალიან მნიშვნელოვანი მოვლენა იყო ქვეყანაში, რომელიც საერთაშორისო არენაზე თავის დამკვიდრებას იწყებდა. 2022 წელს კი სახელმწიფო ორგანოებმა და უწყებებმა „BIAFF“-ის დაფინანსებაზე უარი თქვეს და 2026 წლამდე საკითხი გადაუჭრელ პრობლემად რჩებოდა.
დაკავშირებული თემები ⇓
აჭარის განათლების სამინისტრო და ბათუმის მერია BIAFF-ს არც წელს დააფინანსებს
ელისო ბოლქვაძის საქველმოქმედო ფონდ „ლირას“ აჭარის ბიუჯეტიდან 673 180 ლარი გადაერიცხა
