შსს ცნობით, საგამოძიებო მოქმედებების შედეგად, თურქეთის რესპუბლიკის მოქალაქეები — 2000 წელს დაბადებული ბ.ქ., 1997 წელს დაბადებული დ.ქ. და 1971 წელს დაბადებული, წარსულში ნასამართლევი ჰ.ქ. დააკავეს.
შინაგან საქმეთა სამინისტროს ინფორმაციით, დაკავებულებს ბრალად ედებათ ყალბი დოკუმენტების დამზადება, შენახვა, გასაღება და გამოყენება, რაც საქართველოს სისხლის სამართლის კოდექსის 362-ე მუხლით ითვალისწინებს მაქსიმუმ 3 წლამდე თავისუფლების აღკვეთას.
გამოძიებით დადგინდა, რომ ბრალდებულები ბათუმში, საკუთარ საცხოვრებელ ბინაში, სპეციალური ტექნიკის გამოყენებით ამზადებდნენ სხვადასხვა სახის ყალბ ოფიციალურ დოკუმენტებს — მათ შორის, მართვის მოწმობებს, პირადობისა და ბინადრობის მოწმობებს.
დროებითი საცხოვრებლის ჩხრეკისას, სამართალდამცველებმა ნივთმტკიცებად ამოიღეს ბრალდებულთა მიერ დამზადებული ყალბი დოკუმენტები, პერსონალური კომპიუტერები, სპეციალური ტექნიკა და დოკუმენტების დასამზადებელი მასალები. საქმეზე გამოძიება გრძელდება საქართველოს სისხლის სამართლის კოდექსის 362-ე მუხლით — ყალბი დოკუმენტის დამზადება, გასაღება ან გამოყენება.
