ბათუმის სახელმწიფო უნივერსიტეტი წელს, კურსდამთავრებულებს ერთობლივი ღონისძიების გარეშე დაემშვიდობება, ამის შესახებ სტუდენტებს უკვე აცნობეს, რაც მათი უკმაყოფილების მიზეზი გახდა. არადა ახალგაზრდები წინა წლების მსგავსად, გრანდიოზულ, სხვადასხვა აქტივობით დატვირთულ საღამოს ელოდებოდნენ.
ის, რომ წელს ღონისძება არ გაიმართება სტუდენტთა ნაწილს ამის შესახებ ინფორმაცია არ გააჩია, ისინი ამ დრომდე უნივერსიტეტის ადმინისტრაციისგან განმარტებებს ელოდებიან. ახალგაზრდები სოციალურ ქსელში იმასაც წერენ, რომ შესაძლოა ღონისძიების ორგანიზების შესახებ უნივერსიტეტს წერილობით მიმართონ.
სტუდენტები ასევე იმასაც ეჭვობენ, რომ ისინი რუსული კანონის საწინააღმდეგო აქციებში მონაწილეობისა და ორგანიზების პროცესში ჩართვისთვის დასაჯეს.
აი, რას წერენ ბსუ-ს სტუდენტები სოციალურ ქსელში:
- “როგორც გაირკვა წელს უნივერსიტეტი მთელი კურსდამთავრებულებისთვის დიდ, საერთო გამოშვებას არ ატარებს და გამოსაშვებები ჩატარდება მხოლოდ ფაკულტეტებზე ცალ-ცალკე ყველანაირი გრანდიოზული ღონისძიებების გარეშე. შარშან თუ გახსოვთ ძალიან კარგი გამოსაშვები მოაწყვეს, გაფორმებული იყო ეზო და თამადაც ყავდათ მოწვეული. მგონია, რომ ყველას უნდა გვქონდეს იმის სურვილი, რომ არ დავიჩაგროთ და უნივერსიტეტმა ჩვენც ასეთივე გამოსაშვები მოგვიწყოს. შესაბამისად, რა აზრის ხართ რომ ყველამ ერთად მოვითხოვოთ საერთო გამოსაშვები უნივერსიტეტის შიდა ეზოში”
- “4 წლის უკან არ ჩატარდა სკოლის დამთავრების გამოშვება. უნივერსიტეტის იმედზე ვიყავი და ისინიც არაფერს არ აკეთებენ. რა დროს ვცხოვრობთ”
- “უნდა ჩატარდეს საერთო დიდი ღონისძიება”
- “კორონას მერე დაჩაგრულების რანგში ყოფნა მოსაწყენია, იაქტიურეეთ”
- “ამდენი ხანი იმიტომ გაწელეს რომ არაფერი ყოფილიყო”
- “დაგვსაჯეს ხომ პროტესტანტი სტუდენტები? ალბათ ახლა იმის შიშიც აქვთ რომ დიდ ღონისძიებაზე ბანერები არ გავშალოთ”
- პროტესტის შეეშინდათ? ხალხო გაგვიკეთეთ დიდი ღონისძიება, ნუ გეშინიათ თქვენს მიერ ორგანიზებულ ღონისძიებაზე ვიზეიმებთ და რუსულ კანონს არ ვახსენებთ”
“აჭარა თაიმსი” ბათუმის სახელმწიფო უნივერსიტეტის ადმინისტრაციას დაუკავშირდა, სადაც განმარტეს, რომ ფაკულტეტების მიხედვით ტარდება გაცილების ცერემონია და ამის შესახებ სტუდენტები ინფორმირებულები არიან. რატომ არ იმართება ერთობლივი ღონისძიება? კითხვაზე ბსუ-ში არ გვიპასუხეს.
“ორშაბათიდან ფაკულტეტების მიხედვით ტარდება გაცილების ცერემონია, ეს აპრობირებული მეთოდია ბევრ უნივერსიტეტში. სტუდენტები უკვე ემზადებიან. წელს უნივერსიტეტმა ფაკულტეტებთან შეთანხმებით, გადაწყვიტა რომ ზეიმი ეზოში გაიმართოს,” – გვითხრეს ბსუ-ში.
