„ერთიანი ნაციონალური მოძრაობა“ შუქისა და ბუნებრივი აირის სუბსიდირების ინიციატივით გამოდის. პარტიის წარმომადგენელმა რეზო ხარაზმა ბრიფინგზე განაცხადა, რომ პარტა ითხოვს, 100 კვტ ელექტროენერგიისა და 100 კუბმ ბუნებრივი აირის გადასახადი დაიფაროს ბიუჯეტიდან.
“გამომდინარე იქიდან, რომ საქართველოში ხელისუფლება მიტაცებული აქვს რუსულ მარიონეტულ რეჟიმს, ის ბუნებრივია არ მიგვაჩნია არანაირი პოლიტიკური მოთხოვნის თუ წინადადების ადრესატად! ამიტომ ახლა რასაც ვაჟღერებთ, ეს გახლავთ მხოლოდ გზავნილი ჩვენი მოქალაქეებისადმი. მეგობრებო, როცა ენმ ვიყავით ხელისუფლებაში, ჩვენს დროსაც იყო დიდთოვლობა და სხვა სტიქიური მოვლენები, თუმცა ერთი დიდი განმასხვავებელი ნიშნის თანხლებით – მაშინ ხელისუფლება, მიხეილ სააკაშვილის მეთაურობით მსგავს მოვლენათა ეპიცენტრში იყო სრულად მობილიზებული, რათა გადაგვერჩინა თითოეული ადამიანის სიცოცხლე და გაგვეწია დროული დახმარება! ჩვენ თავის დროზე, დიდთოვლობისას, შესაბამის მუნიციპალიტეტში მცხოვრებ თანამოქალაქეებს დავუსუბსიდირეთ ელექტროენერგიისა და გაზის მოხმარების გადასახადი! ახლაც გამოვდივართ წინადადებით: 100 კვტ ელექტროენერგიისა და 100 კბმ გაზის გადასახადი დაიფაროს ბიუჯეტიდან,” – განაცხადა რეზო ხარაზმა ბრიფინგზე.
