„თეთრი მაგნოლია“ – ასე ეწოდება მრავალბინიან კორპუსს, რომელიც ბათუმის ზღვისპირა ზოლში, შერიფ ხიმშიაშვილის ქუჩა №4-ში მდებარეობს.
საქართველოს მუნიციპალური განვითარების ფონდი არსებული საცხოვრებელი შენობის რეაბილიტაციას გეგმავს. უწყებამ უკვე გამოაცხადა 2.5 მლნ ლარის სავარაუდო ღირებულების კონკურსი, რომელში გამარჯვებული სუბიექტიც საპროექტო-სახარჯთაღრიცხვო დოკუმენტაციას მოამზადებს. წინადადებების მიღება 16 ივლისს დასრულდება.
აღსანიშნავია, რომ ფასი მითითებულია დამატებითი ღირებულების გარეშე. სამუშაოები უნდა განხორციელდეს „ქვეყნის ქალაქებისა და კურორტების განვითარების მიზნით განსახორციელებელი ღონისძიებების“ პროგრამის ფარგლებში. ამის შესახებ მთავრობამ განკარგულება ჯერ კიდევ 2023 წლის 20 აპრილს გამოსცა, ირაკლი ღარიბაშვილის პრემიერ-მინისტრობის დროს. განკარგულებაზე ხელს სწორედ ღარიბაშვილი აწერს.
„შენობა-ნაგებობის ამჟამინდელი მდგომარეობა უარყოფითად აისახება ადგილობრივი მოსახლეობის საცხოვრებელ პირობებსა და მთლიანად ურბანულ გარემოსა და ტურისტულ მიმზიდველობაზე. განსაკუთრებულ ყურადღებას საჭიროებს შენობის ფასადის მდგომარეობა, რომელიც ვიზუალურად არ შეესაბამება თანამედროვე ქალაქის იერსახეს და საჭიროებს სათანადო განახლებასა და რეაბილიტაციას. ქალაქის განვითარებისა და ტურისტული პოტენციალის სრულყოფილად გამოყენების მიზნით, მნიშვნელოვანია განხორციელდეს კომპლექსური სარეაბილიტაციო სამუშაოები, რაც მოიცავს როგორც კონსტრუქციულ გამაგრებას, ასევე, ფასადის მოწესრიგებასა და ესთეტიკურ გაუმჯობესებას“, – წერია სატენდერო დოკუმენტაციაში.
ტექნიკური დავალების თანახმად, სამუშაოები სამ ეტაპს მოიცავს. შენობა სრულად უნდა გაახლდეს და თანამედროვე ურბანულ გარემოსთან შესაბამისი სახე მიიღოს. პროექტის მიხედვით, იგეგმება სახლის კონსტრუქციის გამაგრება, ფასადის მოწესრიგება, არქიტექტურული ელემენტების აღდგენა. საჭიროების შემთხვევაში, შეიძლება განხორციელდეს უნებართვო მიშენებების დემონტაჟი, რადგან, როგორც დოკუმენტაციაშია აღნიშნული, ისინი შენობის იერსახეს არღვევს.
„იცით, რა მდგომარეობაშია საცხოვრებელი კომპლექსი „მაგნოლია“. დაგეგმილია მისი რეაბილიტაცია, ფასადის სრული გამოცვლა და აღდგენა. ვფიქრობ, ქალაქის ცენტრში სრულიად განსხვავებული იერსახის კორპუსს მივიღებთ,“ – განაცხადა ზურაბ პატარაძემ აჭარის უმაღლეს საბჭოში მთავრობის საქმიანობის ანგარიშის წარდგენისას.
„მაგნოლიის“ მშენებლობა კომპანია „ცენტრ პოინტმა“ 2005 წელს დაიწყო. შენობა 2008 წელს უნდა ჩაბარებულიყო, თუმცა ორგანიზაციის ფინანსური პრობლემებისა და სკანდალების გამო, პროცესი გაჭიანურდა. საბოლოოდ, ობიექტის მართვა სხვა კომპანიამ გადაიბარა და ძირითადი სამშენებლო სამუშაოები 2011 წლის შემოდგომაზე დასრულდა.
ამის მიუხედავად, სახლის საკომუნიკაციო სისტემები, წლების განმავლობაში, მოუწესრიგებელი იყო. ამიტომ ბათუმის მერია მას ექსპლუატაციაში არ იღებდა. პრობლემები დღემდე მოუგვარებელია, თუმცა შენობაში არაერთი ოჯახი ცხოვრობს. ასევე ფუნქციონირებს რამდენიმე კომერციული ფართიც.
2023 წელს არსებობდა შენობის რეაბილიტაციის იდეა, რომელიც ბათუმის მერიაში ერთ-ერთმა მოქალაქემ პროგრამის „შენი იდეა ბათუმს“ ფარგლებში წარადგინა. იდეის თანახმად, რეაბილიტაციაზე 300 000 ლარი დაიხარჯებოდა. თუმცა მერიამ გადაწყვიტა, რომ იდეა მის უფლებამოსილებაში არ შედიოდა.
„თეთრი მაგნოლიას“ დემონტაჟსა და მის ნაცვლად ახალი კომპლექსის მშენებლობაზე გასულ წლებში აქტიურად საუბრობდნენ. მოქალაქეები წლების განმავლობაში შენობას ქალაქის ერთ-ერთ ყველაზე პრობლემურ და ვიზუალურად მიუღებელ შენობად მოიხსენიებენ.
გმირთა ხეივანში ხიდებისა და კომერციული ობიექტების რეაბილიტაცია დაიწყო
