ბათუმში, გმირთა ხეივნის რეაბილიტაციის “დასრულების” შესახებ მთავრობამ დაახლოებით ერთი თვის წინ განაცხადა. საქართველოსა და აჭარის მთავრობამ პროექტის პრეზენტაცია გამართა, თუმცა იკვეთება, რომ სამუშაოები ხარვეზებით შესრულდა.
გმირთა ხეივნის მთელს პერიმეტრზე 6 შადრევანია, საიდანაც 5 არ მუშაობს. გამაგრილებელი საშუალება არც პრეზენტაციის დღეს ფუნქციონირებდა, ეს მთავრობის მიერ გავრცელებული კადრებიდანაც კარგად ჩანს.
სკვერში ინფრასტრუქტურული ხარვეზები ამით არ სრულდება. ლამპიონების დაწილი გათიშულია და მწყობრიდანაა გამოსული. ფაქტის ამსახველი ფოტო “აჭარა თაიმსმა” 2 ივლისს გადაიღო.
ირკვევა, რომ სკვერში არც ელექტროენერგიის სადენებია გამართულ მდგომარეობაში. ბეტონის ნაწილი ამოჭრილია და სარეაბილიტაციო სამუშაოები მიმდინარეობს.
უფუნქციოა შეზღუდული შესაძლებლობის მქონე პირებისთვის გათვალისწინებული ლიფტებიც, რომელთა საშუალებითაც ეტლით მოსარგებლე პირებმა ხიდებზე ასვლა უნდა შეძლონ. კაბინები პროექტის პრეზენტაციის დღესაც დაკეტილი იყო.
ბათუმში ჟიული შარტავას სახელობის გმირთა ხეივნის სრული რეაბილიტაცია რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, პროგრამა „განახლებული რეგიონების“ ფარგლებში განახორციელა. პროექტი სახელმწიფო ბიუჯეტიდან 35 მილიონამდე ლარით დაფინანსდა.
უწყებაში ინფრასტრუქტურულ ხარვეზებზე დასმული კითხვები უპასუხოდ დატოვეს. თუმცა აღნიშნეს, რომ პროექტი ბათუმის მერიას ჩააბარეს და მასზე პასუხისმგებელი სწორედ ეს უწყებაა. “აჭარა თაიმსის” კითხვებს არც ბათუმის მერიაში უპასუხეს.
