„ქართული ოცნების“ ბათუმის საკრებულო მომდევნო სხდომაზე იმსჯელებს მერიის წინადადებაზე, რომელიც მუნიციპალიტეტის საკუთრებაში არსებული მეორადი ქვაფენილების ეკლესიებისთვის უსასყიდლოდ გადაცემას ითვალისწინებს.
საკრებულოსთვის წარდგენილი დოკუმენტის მიხედვით, საუბარია 3300 კვადრატულ მეტრ მეორად ქვაფენილზე, რომელიც ბათუმის სხვადასხვა ქუჩაზე რეაბილიტაციის მოტივით აყარეს.
ქვაფენილების ნაცვლად, ქუჩები ასფალტით დაიფარა, რომელიც გარემოსდაცვითი თვალსაზრისით არაეკოლოგიურად არის მიჩნეული.
დოკუმენტში აღნიშნულია, რომ ამ ეტაპზე აყრილი ქვაფენილები „საქართველოს საპატრიარქოს“ გადაეცეს და გამოყენებული იქნას ეკლესიებისა და მონასტრების ეზოების კეთილმოწყობისთვის.
ქვაფენილების განაწილება შემდეგნაირად არის განსაზღვრული:
- 800 კვ.მ. – ბათუმის ყოვლადწმინდა სამების ტაძრისა და სამონასტრო კომპლექსისთვის;
- 2000 კვ.მ. – ახალშენის ფერისცვალების სახელობის ტაძრისა და მონასტრისთვის;
- 500 კვ.მ. – ბობოყვათში მდებარე სამი მღვდელმთავრის – წმინდა ბასილი დიდის, წმინდა გრიგოლ ღვთისმეტყველისა და წმინდა იოანე ოქროპირის სახელობის ტაძრისთვის.
როგორც განმარტებით ბარათშია აღნიშნული, ქონების უსასყიდლოდ გადაცემა ემყარება „ადგილობრივი თვითმმართველობის კოდექსით“ განსაზღვრულ უფლებამოსილებებს და გადაწყვეტილების მიღება საკრებულოს კომპეტენციაა.
