დღეს აჭარის მთავრობის სახლთან ოპოზიციური პარტიების – „ლელო საქართველოსთვის“, „ერთიანი ნაციონალური მოძრაობისა“ და „გახარია-საქართველოსთვის“ წევრებმა ერთობლივი ბრიფინგი გამართეს.
მათი განცხადებით, ხელისუფლებამ უნდა შეწყვიტოს მედიაზე ზეწოლა და დაუყოვნებლივ გაათავისუფლოს ჟურნალისტი და მედიამენეჯერი მზია ამაღლობელი.
ინფორმაციისთვის: მზია ამაღლობელი 17 დღეა შიმშილობს.
„აჭარაში მედიის თავისუფლება მძიმე მდგომარეობაშია. ბოლო წლებში აშკარად გამოჩნდა, როგორ იზრდება ხელისუფლების გავლენა რეგიონულ მედიაზე. ვიხილეთ, როგორ მოხდა დირექტორებისა და ჟურნალისტების უკანონო გათავისუფლება აჭარის ტელევიზიიდან, „ტვ 25“-ის დახურვა და ახლა მიმდინარეობს შეტევა „ბათუმელებსა“ და „ნეტგაზეთზე“. მზია ამაღლობელის დაკავება ამ პროცესის გაგრძელებაა,“ – განაცხადეს პარტიებმა.
ოპოზიციური ლიდერების თქმით, მზია ამაღლობელის დაკავებისას მას პოლიციის ხელმძღვანელმა ირაკლი დგებუაძემ შეურაცხყოფა მიაყენა, თუმცა აღნიშნულ ფაქტზე პასუხისმგებელი პირები არ დასჯილან.
პარტიებმა საერთაშორისო ორგანიზაციებს, საელჩოებსა და მედიას მოუწოდეს, რეაგირება მოახდინონ ქვეყანაში მედიის წინააღმდეგ განხორციელებულ ზეწოლაზე და სანქციები დაუწესონ იმ პირებს, ვინც მედიაზე ზეწოლაში მონაწილეობენ.
„ჩვენ მზია ამაღლობელის გათავისუფლებისთვის ბოლომდე ვიბრძოლებთ. მისი სიცოცხლე და ჯანმრთელობა დაუყოვნებლივ უნდა იყოს დაცული. ასევე, საჭიროა სათანადო შეფასება მიეცეს აჭარაში ადამიანის უფლებების დარღვევებსა და მედიაგარემოს მძიმე მდგომარეობას,“ – აღნიშნეს ბრიფინგზე.
