“ქართული ოცნების” პარლამენტმა მესამე მოსმენით და დაჩქარებული წესით დაამტკიცა საკანონმდებლო პაკეტი, რომლის შედეგადაც საერთაშორისო დონორი ორგანიზაციები გრანტებს მხოლოდ მთავრობის თანხმობით გასცემენ. შესაბამის ცვლილებებს მხარი 80-მა დეპუტატმა დაუჭირა.
კანონის თანახმად, გრანტის მთავრობის თანხმობის გარეშე გაცემაც და მიღებაც იკრძალება, რაც ადმინისტრაციულ პასუხისმგებლობას და ფინანსურ სანქციას – გრანტის ორმაგი ოდენობით დაჯარიმებას ითვალისწინებს. მონიტორინგის ფუნქციას ანტიკორუფციული ბიურო განახორციელებს. ცვლილებები “მოქალაქეთა პოლიტიკური გაერთიანებების შესახებ” კანონს, “გრანტების შესახებ” კანონს და სხვა შესაბამის სამართლებრივ აქტებს მოიცავს.
ახალი რეგულაციები ასევე ზღუდავს საერთაშორისო ორგანიზაციების მონაწილეობას პოლიტიკური პარტიების სასარგებლოდ გამართულ საჯარო ღონისძიებებში. კერძოდ, აეკრძალებათ პარტიებისთვის ლექციების, სემინარების და სხვა მსგავსი აქტივობების ორგანიზება.
კანონში განსაზღვრულია რამდენიმე გამონაკლისი: მთავრობის თანხმობის წესი არ შეეხება საერთაშორისო სპორტული ორგანიზაციების მიერ გაცემულ გრანტებს, ასევე საქართველოს საზღვრებს გარეთ განათლებისა და სამეცნიერო საქმიანობისთვის გაცემულ ინდივიდუალურ სტიპენდიებს. საკანონმდებლო ცვლილებების ავტორი და ინიციატორია ფრაქცია “ქართული ოცნება”, რომელმაც კანონპროექტი დაჩქარებული წესით წარადგინა და დაამტკიცა.
