224 მომხრე და 1 წინააღმდეგი – ბიძინა ივანიშვილის სურვილით, ისტორიაში პირველად, საქართველოს უდიპლომო, არალეგიტიმური პრეზიდენტი ჰყავს. ასევე, ქვეყნის ისტორიაში პირველად, მიხეილ ყაველაშვილი ერთადერთი, უალტერნატივო საპრეზიდენტო კანდიდატი იყო.
ყოფილი ფეხბურთელი და მეცხრე-მეათე მოწვევის პარლამენტის წევრი მიხეილ ყაველაშვილი კენჭისყრის პროცეს არ ესწრებოდა, ის სხდომათა დარბაზში შედეგების შემდეგ გამოჩნდა. არალეგიტიმურ პრეზიდენტობის კანდიდატს ხმა ჯერ პარლამენტის წევრებმა, შემდეგ კი კოლეგიაში მყოფი სხვა სახელმწიფო ორგანოების წარმომადგენლებმა, ანბანური თანმიმდევრობით მისცეს.
ფიქტიური არჩევნების პარალელურად პარლამენტის შენობის წინ დილიდან მასშტაბური საპროტესტო აქცია მიმდინარეობდა. შეკრებილები “ქართული ოცნების” გადაწყვეტილებას ეწინააღმდეგებოდნენ, ისინი ლეგიტიმურ პრეზიდენტად სალომე ზურაბიშვილს მიიჩნევენ.
ინფორმაციისთვის: 26 ოქტომბრის ჩატარებულ საპარლამენტო არჩევნებში ბარიერგადალახული ოპოზიცია კენჭისყრაში არ მონაწილეობდა. “ქართულ ოცნებას” საარჩევნო კოლეგიაში 211 წევრი ჰყავდა, რაც პირველივე ტურში კანდიდატის დასამტკიცებლად საკმარისი იყო.
